खोज

 काठमाडौं ।

दोस्रो त्रैमासको अन्तिम कारोबार दिन सेयर बजार परिसूचक नेप्सेमा ०.५९ प्रतिशतको गिरावट आएको छ र २६०० को बिन्दुबाट तल झरेर २५९४.१३ मा पुगेको छ। सोमबार नेप्से परिसूचक १५.५४ अंकले घटेर यो स्तरमा पुगेको हो।

नेप्सेमा गिरावट भए पनि सोमबार कारोबार रकम उल्लेख्य रुपमा वृद्धि भएको छ। गत बिहीबार ७ अर्बभन्दा बढी कारोबार भएको बजार आइतबार ४ अर्बमा समेत पुग्न सकेको थिएन।

तर सोमबार ६ अर्ब ६५ करोड ९ लाखको कारोबार भएको छ, जसमा ६४ हजार २ सय ७८ कारोबार मार्फत १ करोड ३८ लाख ७० हजार ५ सय ७९ कित्ता धितोपत्र किनबेच भएको छ।

बैंकहरूको वित्तीय विवरण बिग्रिन थालेको र साना तथा मझौला व्यवसाय कर्जा रिकभरीमा समस्या आउन थालेपछि सेयर बजारमा मनोवैज्ञानिक प्रभाव परेको देखिन्छ। यसका कारण सेयर बजारमा लगातार गिरावट आएको हो। सोमबार नेप्सेमा सबै उपसूचकमा गिरावट देखिएको छ।

व्यापार उपसूचक १.८९ प्रतिशत, होटल तथा पर्यटन उपसूचक १.३६ प्रतिशत, र वित्त कम्पनी उपसूचक १.३२ प्रतिशतले गिरावट आएको छ।

सोमबार २ सय ४३ सूचीकृत कम्पनीको सेयर कारोबार भएको थियो, जसमा १ सय ७५ कम्पनीको सेयर मूल्य घटेको र ६३ कम्पनीको बढेको छ। ५ कम्पनीको कारोबार स्थिर रह्यो।

बाराही हाइड्रोपावरको सेयर मूल्य १० प्रतिशतले बढेर सकारात्मक सर्किटमा बन्द भएको छ। यस्तै, सुपर मादी हाइड्रोपावर, नारायणी डेभलपमेन्ट बैंक, सपोर्ट लघुवित्त र नेपाल एसबीआई बैंकको सेयर मूल्य पनि सकारात्मक सर्किटमा बन्द भएका छन्।

त्यस्तै, आत्मनिर्भर लघुवित्त र सिन्धु विकास बैंकको सेयर मूल्य १० प्रतिशत घटेर नकारात्मक सर्किटमा बन्द भएका छन्।

सोमबार एनआरएन इन्फ्रास्ट्रक्चर एन्ड डेभलपमेन्ट कम्पनीको सेयर सर्वाधिक ४५ करोड २६ लाखको कारोबार भएको थियो।