खोज

 काठमाडौं,२८ पुस ।

राष्ट्रिय स्वतन्त्र पार्टी (रास्वपा) का सभापति रबि लामिछानेको बयान आज न्यायाधीश माधवप्रसाद अधिकारीको इजलासमा हुनेछ। अधिकारीको इजलासमा लामिछानेको बयान र थुनछेक बहस हुने अदालत स्रोतले जानकारी दिएको छ।

गत बिहीबार, जिल्ला अदालत कास्कीका न्यायाधीश नितिजकुमार राईको इजलासले लामिछानेसहित ७ जनालाई धरौटीमा रिहा गर्न आदेश दिएको थियो।

धरौटीमा रिहा भएपश्चात लामिछानेलाई प्रहरीले काठमाडौं जिल्ला अदालतमा उपस्थित हुने शर्तमा परिवारको जिम्मामा लगाएको थियो। सोही अनुसार लामिछाने आज बिहान काठमाडौं जिल्ला अदालतमा उपस्थित भएका छन्।

लामिछानेविरुद्ध काठमाडौंको स्वर्णलक्ष्मी सहकारी ठगीको अभियोगमा मुद्दा दर्ता भएको छ। उक्त मुद्दामा बयान दिन लामिछाने आज अदालत हाजिर भएका हुन्।

प्रहरी अनुसन्धान अनुसार, स्वर्णलक्ष्मी सहकारीबाट गोर्खा मिडिया नेटवर्कमा कानुनी विपरीत ५ करोड ७८ लाख ९८ हजार ४८० रुपैयाँ गएको देखिएको छ। सरकारी वकिलले उक्त रकमको बिगो मागदाबी गरेका छन्।

कास्कीको सूर्यदर्शन सहकारी ठगी प्रकरणमा धरौटीमा रिहा भएका लामिछानेविरुद्ध काठमाडौंको स्वर्णलक्ष्मी सहकारी, बुटवलको सुप्रिम, चितवनको सहारा र पर्साको सानो पाइलामा पनि मुद्दा दर्ताको प्रक्रिया अघि बढेको छ।