खोज

एडमन्ड सिटी हस्पिटलले “स्वस्थ नागरिक, हाम्रो चाहना” भन्ने नारासहित शनिबार बृहत् निःशुल्क स्वास्थ्य शिविर सम्पन्न गरेको छ। शिविरको उद्देश्य स्वास्थ्य समस्याहरूको समयमै निदान र निराकरण गर्दै जनताको स्वास्थ्य सचेतना अभिवृद्धि गर्नु रहेको थियो।

शिविरमा ३ सय ५० जना महिला र पुरुषले सेवा लिएका थिए। शिविरमा १ सय २५ जनाको भिडियो एक्स-रे, २ सय जनाको थाइराईड परीक्षण र २ सय ५० जनाको सुगर जाँच समेत गरिएको थियो।

शिविरको उद्घाटन गर्दै बुटवल उपमहानगरपालिका वडा नं. १३ का वडा अध्यक्ष नारायण प्रसाद पुनले निःशुल्क शिविर सञ्चालनले जनतालाई चेकजाँच गर्न सहज भएको बताए। कार्यक्रममा एडमन्ड सिटी अस्पतालका अध्यक्ष प्रकाश रानाले अस्पतालले चाँडै नै न्यूरो सर्जरीमा प्रयोग हुने ४ करोड मूल्य बराबरको अत्याधुनिक दूरबीन ल्याउने तयारी भइरहेको जानकारी दिए। उक्त उपकरण पछि एडमन्ड सिटी अस्पताल यस क्षेत्रकै पहिलो ट्रमा सेन्टरको रूपमा विकास हुने अपेक्षा गरिएको छ।

अस्पतालका अनुसार शिविरमा परीक्षण गरिएका बिरामीहरूको रिपोर्ट आइतबार पाउने व्यवस्था गरिएको छ। अस्पतालले विभिन्न समयमा यस्ता शिविरहरू सञ्चालन गर्दै समुदायको स्वास्थ्य सुधारमा योगदान पुर्‍याउँदै आएको छ।

एडमन्ड सिटी अस्पतालले गरेको शिविरले स्थानीयवासीहरूलाई लाभ पुगेको छ।