खोज

कपिलवस्तु २५ पुस ।
पुस २३ गते जिल्ला प्रहरी कार्यालय कपिलवस्तुको टोलीले ५ बिभिन्न मुद्दामा ६१ बर्ष कैद सजाय भएका फरार प्रतिवादीलाई नियन्त्रणमा लिएको छ । प्रहरीको टोलीले कपिलबस्तु जिल्लाको साविक शिवनगर गा.वि.स. वडा नं.०५ हाल कृष्णनगर नगरपालिका वडा नं. ०१ गुर्चिहवा बस्ने अन्दाजी ५७ बर्षका सोमई भन्ने प्रकाश कहारलाई कृणनगर १ बाट नियन्त्रणमा लिएको हो । ३ वटा खुन डाँका, १ वटा डाँका तथा १ वटा चोरी मुद्दा गरी जम्मा ५ वटा मुद्दाहरूमा विभिन्न मितिमा फैसला भई जम्मा कैद सजाय ६१ (एकसठ्ठी) वर्ष र कुल जरिवाना तीन लाख बाउन्न हजार सात सय अठहत्तर कैद भुक्तान तथा जरिवाना असुल गर्न बाँकी रहेका कहार प्रहरी नियन्त्रणमा परेका हुन ।

यस अघि प्रहरीले यहि पुस २२ गते लागु औषध (ब्राउन सुगर) सम्बन्धी मुद्दाको फरार प्रतिवादीलाई २५ बर्षपछि पक्राउ गरेको थियो । कपिलवस्तु जिल्ला अदालत तौलिहवाबाट मिति २०५६ चैत २८ गतेको फैसलाको आदेशनुसार लागूऔषध (ब्राउन सुगर) सम्बन्धी मुद्दामा ३ (तीन) वर्ष कैद र २५ हजार रूपैयाँ जरिवाना तोकिएका फरार प्रतिवादी जिल्ला कपिलबस्तु बिजयनगर गाउँपालिका वडा नं. ०१ का ५१ बर्षिय कृष्ण बहादुर चौधरीलाई नियन्त्रणमा लिईएको थियो । जिल्लाको बिजयनगर गाउँपालिका वडा नं. ०१ मा लुकी छिपी बसेको अवस्थामा उनलाई प्रहरीको टोलीले नियन्त्रणमा लिएको जिल्ला प्रहरी कार्यालय कपिलवस्तुका प्रवक्ता प्रहरी नायब उपरिक्षक मोहनमणी अधिकारीले जानकारी दिए । पक्राउ दुवैलाई कैद कट्टा र जरिवाना असुलीका लागि प्रहरीले अदालतमा पेश गरे सगैं दुवै जना कपिलवस्तु कारागार चलान भएका छन ।
पछिल्लो समय कपिलवस्तु प्रहरीले फरार प्रतिवादी नियन्त्रणको कार्यलाई तिव्रता दिएको छ । चालु आर्थिक बर्षको हालसम्मको अबधीमा प्रहरीले २ सय ४८ जना फरार प्रतिवादी पक्राउ गरेको छ । पक्राउ गरिएका फरार प्रतिवादीबाट १ सय ५९ बर्ष २२ दिन कैद र ७६ लाख ६३ हजार ५ सय ३० रूपैयाँ जरिवाना रकम असुल उपर हुनेछ । चालु आर्थिक आर्थिक बर्षको ६ महिनाको अबधी नपुग्दै कपिलवस्तु प्रहरीले अघिल्लो आर्थिक बर्ष भन्दा करिब दुई गुणा हाराहारीमै फरार प्रतिवादी पक्राउ गरेको छ । गत आर्थिक बर्ष २०८०/८१ मा कपिलवस्तु प्रहरीले १ सय ३५ फरार प्रतिवादी नियन्त्रणमा लिई १ सय ६५ बर्ष ५ महिना कैद र २२ लाख ५६ हजार ४ सय ५० जरिवाना असुल उपरका लागि अदालतमा पेश गरेको थियो । त्यसैगरि अघिल्लो आर्थिक बर्ष २०७९/८० मा कपिलवस्तु प्रहरीले ७२ फरार प्रतिवादी नियन्त्रणमा लिई १ सय ८ बर्ष १ दिन कैद र १ करोड ४४ लाख ७० हजार ९ सय ५६ रूपैया जरिवाना असुलका लागि अदालतमा पेश गरेको तथ्याङ्क रहेको प्रहरी नायब उपरिक्षक अधिकारीले स्पष्ट पारें ।

अपराध कर्म र अपराधिक मानसिकता रोकेर समाजमा दण्डहिनताको अवस्था अन्त्य गर्नका लागी फरार प्रतिवादी पक्राउ गर्ने कार्यलाई तिव्रता दिईएको कपिलवस्तुका प्रहरी प्रमुख प्रहरी उपरिक्षक निरन्जनदत्त भट्टले जानकारी दिए । अपराध गर्ने व्यक्ति अदालत र प्रहरीको नजरबाट लामो समय सम्म बच्न नसक्ने सन्देश प्रवाह गरि अपराधिक मनोभावना गिराउन भूमिका खेल्ने उदेश्यका साथ फरार प्रतिवादी पक्राउको कार्यलाई निरन्तरता दिन प्रहरी तयार रहेको उनले स्पष्ट पारे ।