खोज

काठमाडौं, २३ पुस ।

नेपालमा पछिल्लो २१ दिनको अवधिमा ४ म्याग्निच्युडभन्दा माथिका ११ वटा भूकम्पको धक्का लागेको छ। राष्ट्रिय भूकम्प मापन तथा अनुसन्धान केन्द्रका अनुसार पुस २ गतेदेखि मंगलबारसम्मको अवधिमा यी भूकम्पहरू रेकर्ड गरिएको हो।

मंगलबार मात्र चीनको तिब्बतमा ७ म्याग्निच्युडको शक्तिशाली भूकम्प गएको जानकारी प्राप्त भएको छ। उक्त भूकम्पको धक्का नेपालका ९ जिल्लामा कडा महसुस भएको थियो, जबकि थप केही जिल्लामा सामान्य धक्का महसुस भएको थियो। यद्यपि, यस भूकम्पबाट नेपालमा हालसम्म कुनै मानवीय क्षति भएको जानकारी प्राप्त भएको छैन।

पुस १९ गते मुगु केन्द्रबिन्दु भएर ४.४ म्याग्निच्युड, सोही दिन मनाङ केन्द्रबिन्दु भएर ४.१ म्याग्निच्युड, १८ गते सिन्धुपाल्चोक केन्द्रबिन्दु भएर ४.८ म्याग्निच्युड, र १६ गते बैतडी केन्द्रबिन्दु भएर ४.६ म्याग्निच्युडको भूकम्प आएको थियो। यसअघि पुस ११ गते जाजरकोट केन्द्रबिन्दु भएर ४.२, ९ गते दार्चुला केन्द्रबिन्दु भएर ४, ५ गते बाजुरा केन्द्रबिन्दु भएर ५.२, ४ गते मनाङ केन्द्रबिन्दु भएर ४.७, ३ गते बझाङ केन्द्रबिन्दु भएर ४.१ र २ गते बझाङ केन्द्रबिन्दु भएर ४.३ म्याग्निच्युडका भूकम्पहरूको धक्का पनि महसुस गरिएको थियो।

नेपाल भूकम्पीय जोखिम भएको उच्च देश हो। पृथ्वीको सतहमुनि रहेको भारतीय प्लेट प्रतिवर्ष उत्तरमा युरेसियन प्लेटतर्फ सरिरहेको कारण हिमालय क्षेत्रमा भूकम्पीय दरारहरू उत्पन्न हुँदै आएका छन्। यसैले भूकम्पको जोखिम निरन्तर रहने वैज्ञानिकहरूको अनुमान छ।