खोज

सुनवल, २२ पुस ।

पश्चिम नवलपरासीको सदरमुकाम परासीस्थित जिल्ला अदालत अगाडि मिटरव्याज पीडितहरुले प्रदर्शन गरेका छन् । नवलपरासी सहित विभिन्न जिल्लाबाट भेला भएका मिटरव्याज पीडितहरुले अदालत अगाडि प्रदर्शन गरेका हुन् ।

उनीहरुले अदालत पनि निष्पक्ष हुन नसकेको र पीडितहरुलाई थप पीडित बनाउने काम गरेको भन्दै उनीहरुले प्रदर्शन गरेका हुन् । अदालत अगाडि जम्मा भएका उनीहरुले एक घण्टा सडक बन्द गरेर प्रदर्शन गरेका थिए । सो क्रममा प्रहरी संग केहीबेर समान्य धकेलाधकेल भएको थियो ।

मिटरव्याज विरुद्ध किसान मजदुर आन्दोलन लुम्बिनी कमाण्ड नवलपरासी, मिटरव्याज विरुद्ध किसान मजदुर आन्दोलन जिल्ला समिति दाङ लगायतले संयुक्त रुपमा अदालत विरुद्ध नाराबाजी गरेका हुन् । उनीहरुले अदालत विरुद्ध चर्को नाराबाजी गर्दै अदालतले निरन्तर पीडितहरु विरुद्ध एकलौटी फैसला गर्दै आएको दाबी गरेका छन् । नवलपरासीमा सुदखोरहरुले दिएको यातनाका कारण मानिसहरु आत्महत्या गर्ने अवस्थामा पुगेको भन्दै उनीहरुले अदालत निष्पक्ष बन्न नसकेको आरोप लगाएका छन् ।

उनीहरुले आजै जिल्ला अदालत परासीमा ज्ञापन पत्र समेत बुझाएका छन् । अदालतलाई एकहोरो पीडिहरु विरुद्ध फैसला नगर्न सजग गराउँदै अदालतका श्रेस्तेदार रेवतीरमण यादवलाई ज्ञापन पत्र बुझाएका हुन् । आफुहरुले केन्द्रमा सरकारसंग न्यायिक रुपमा समस्याको निरुपण गर्न आग्रह गर्दै आएको बताउदै पीडितहरुले अदालतलाई मिटरव्याजको वास्तविकता बुझेर फैसला गर्न आग्रह गरेका हुन् । सो क्रममा श्रेस्तेदार यादवले अदालत नियम कानुन भन्दा बाहिर जान नसक्ने बताउँदै कानुनमा जस्तो व्यवस्था छ सोही अनुरुप फैसला आएको बताएका छन् ।

मिटरव्याज समस्या समाधानका लागि सरकारले २०७९ सालको चैतमा अनुचित लेनदेन मिटरब्याज सम्बन्धी जाँचबुझ आयोग बनाएको थियो । त्यसपछि गत वर्षको असारमा अनुचित लेनदेन (मिटरब्याज) सम्बन्धी ‘मुलुकी संहिता सम्बन्धी केही नेपाल ऐनलाई संशोधन गर्ने विधेयक, संसदबाट पारित भएको थियो । तर हाल सम्म समस्या भने समाधान हुन सकेको छैन ।