खोज

रौतहट, २२ पुस।

पछिल्लो समय जंगली हात्तीले रौतहट र बाराको विभिन्न पालिकामा उत्पात मच्चाएको छ। हात्तीको आतंकले ग्रामीण क्षेत्रका बासिन्दालाई निकै त्रसित बनाएको छ, जसका कारण गाउँले रातभरि जाग्राम बस्न बाध्य भएका छन्। यद्यपि, नियमनकारी निकायहरू यस समस्याको समाधानमा मौन रहेका छन्।

आज बिहान रौतहटको गुजरा नगरपालिका-३ स्थित जंगलसहिया पशुपती टोलमा जंगली हात्तीले ६ वटा घरमा क्षति पुर्याएको छ। एक्लै आएका ठूलो दारा भएको हात्तीले घरको बार भत्काएको साथै, घरआँगनमा राखिएका धानका भकारी पनि फोडी दिएको स्थानीयहरूले बताएका छन्।

स्थानीय अर्जुन शाही ठकुरी, रामकुमार शाही ठकुरी, श्याम बहादुर, पूर्ण बहादुर, भुटा महरा र हरेन्द्र पासवानका घरमा क्षति पुगेको छ। हात्ती बिहान साढे दुई बजे गाउँमा प्रवेश गर्‍यो र तीन घण्टासम्म घर-घरमा क्षति पुर्याउँदै बिहान ६ बजे जंगलमा फर्किएको स्थानीय समाजसेवी कृष्ण पोखरेलले जानकारी दिए। गाउँलेहरू हात्तीको डरले त्यसवेला आआफ्नो घरमा लुकेर बसेका थिए।

पछिल्लो समय जंगली हात्तीको आतंक रौतहटका विभिन्न क्षेत्र र बाराको कोल्हवी नगरपालिका अन्तर्गतका गाउँमा फैलिएको छ। यसले गाउँमा ठूलो क्षति पुर्याउँदै, मानिसहरूलाई आतंकित बनाएको छ। चन्द्रपुर नगरपालिकाका वडा नम्बर २ र ३ मा पनि हात्तीले तहस नहस गरेको छ, जहाँ केराबारीमा हजारौं केराको बोटमा क्षति पुर्याएको छ।

केही महिनाअघि, कोल्हवी नगरपालिकामा जंगली हात्तीको आक्रमणमा परी एक स्थानीय व्यक्तिको ज्यान गएको थियो। स्थानीयले पटक-पटक हात्ती नियन्त्रणको लागि आग्रह गर्दा पनि नियमनकारी निकायहरूले कुनै प्रभावकारी कदम चाल्न नसकेको गुनासो गरेका छन्।

हात्तीको आतंक र जनजीवनमा पारिएको असरले स्थानीय बासिन्दाले अब प्रभावकारी कदम उठाउन माग गरिरहेका छन्। तथापि, नियमनकारी निकायहरूले यस समस्यालाई गम्भीरतासाथ लिने संकेत भने देखिएका छैनन्।