खोज

भैरहवा, २२ पुस ।

युनिभर्सल ईन्स्च्यिुट अफ एडभान्स स्टडीज् एण्ड रिसर्च सेन्टर प्रा.लि.(युसीएमएस शिक्षण अस्पताल) को २६ औं वार्षिक साधारण सभा आइतबार भैरहवामा सम्पन्न भएको छ ।

साधारण सभामा युसीएमएस शिक्षण अस्पतालका अध्यक्ष रमेश शर्माले वार्षिक प्रतिवेदन पेश गरेका थिए । त्यस्तै संस्थाका प्रबन्ध निर्देशक खुमा प्रसाद अर्यालले सभामा सहभागी शेयर सदस्यहरुबाट उठेका प्रश्न, जिज्ञासा, सुझाव लगायत आगामी कार्ययोजनाका बारेमा आफ्ना धारणा राखेका थिए । कम्पनी सचिव राजु बस्नेत क्षेत्रीले आर्थिक वर्ष २०८०/०८१ को लेखापरीक्षण प्रतिवेदन प्रस्तुत गरेको थिए ।

साधारण सभा अन्तर्गत सम्पन्न निर्वाचनमा आगामी सञ्चालक समितिका लागि निर्देशकमा रमेश शर्मा, खुमा प्रसाद अर्याल, लोकहर्ष शाक्य, सिताराम तिमल्सिना र परिक्षित खेम्का निर्विरोध निर्वाचित भएका छन् ।

साथै साधारण सभापश्चात आइतबार नै बसेको संस्थाको पहिलो सञ्चालक समितिको बैठकले अध्यक्षमा रमेश शर्मा र प्रबन्ध निर्देशकमा खुमा प्रसाद अर्याललाई सर्वसम्मतिले चयन गरेको छ ।

सभामा युसीएमएसका निर्देशक भेषराज अर्याल, सतिष केडिया, संजिविनी ग्रुप अफ कम्पनीका जनरल म्यानेजर सन्तोष कुमार खनाल, युसीएमएस शिक्षण अस्पतालका प्रमुख कार्यकारी अधिकृत अजय कुमार पि.एस., गण्डकी मेडिकल कलेजका प्रमुख कार्यकारी अधिकृत प्रा.डा.रविन्द्रमान श्रेष्ठ, नेपालगंज मेडिकल कलेजका प्रमुख कार्यकारी अधिकृत सन्तोष कुमार वि.एन., प्राचार्य प्रा.डा.लक्ष्मी पाठक, सह–प्राचार्य प्रा.डा.हेमन्त हलुवाई, मेडिकल सुपरीटेण्डेण्ट प्रा.डा.साधन मुखी, वित्त नियन्त्रक सुरज पौडेल लगायतको उपस्थिति रहेको थियो ।

संस्थाका अध्यक्ष रमेश शर्माको अध्यक्षता, निर्देशक लोकहर्ष शाक्यको स्वागत तथा कम्पनी सचिव राजु बस्नेत क्षेत्रीको साधारण सभा सञ्चालनमा भएको थियो ।

हालसम्म यस कलेजबाट स्नातक कार्यक्रम अन्तर्गत एम.बी.बी.एस.मा २ हजार १ सय ६३, बी.डी.एस.मा ७ सय १३, वि.एस.सी. नर्सिङ्गमा २ सय, बी.एन.एस.मा १ सय ३५, बी.फार्मेसीमा १ सय २१, बी.एस्सी. एम.एल.टी.मा ४४, पी.पी.एच.मा ५५, बी.एस.सी. एम.आई.टी.मा ९, स्नातकोत्तर कार्यक्रम अन्तर्गत एम.डी.÷एम.एस.मा २ सय ६३, एम.डी.एस.मा ७१ र एम.एन.मा ७ गरी कुल ३ हजार ७ सय ८१ जना विद्यार्थीहरु दिक्षित भएका छन् ।

अस्पतालका सूचना अधिकारी सुशील गुरुङका अनुसार अस्पतालले आर्थिक वर्ष २०८०/०८१ मा १९ हजार ३ सय ४१ आकस्मिक बिरामी, १ लाख ९२ हजार ८ सय ३७ ओ.पि.डी. बिरामी, १७ हजार ८ सय ३४ आई.पी.(भर्ना बिरामी), ५ हजार ९ सय ६३ शल्यक्रिया, ४ हजार ५७ प्रसुति सेवा (डेलिभरी), ९ हजार ५ सय १६ डायलासिस सेवा र ४ लाख ३३ हजार १ सय २६ प्रयोगशाला परीक्षणमार्फत सेवा दिएको छ ।

रुपन्देहीको भैरहवामा वि.सं. २०५४ सालमा स्थापना भइ स्वास्थ्य सेवामा निजी क्षेत्रवाट सञ्चालित त्रिभुवन विश्वविद्यालयबाट सम्बन्धन प्राप्त नेपालको पहिलो मेडिकल कलेज अन्तर्राष्ट्रियस्तरको दक्ष जनशक्ति उत्पादनका साथै सर्वसुलभ तथा गुणस्तरीय स्वास्थ्य सेवा प्रदान गर्ने विषयमा संस्थाले भोलिका दिनमा थप प्रभावकारी भएर आफ्ना क्रियाकलाप केन्द्रित गर्ने प्रतिवद्धता जाहेर गरेको गुरुङले बताए ।

त्यसैगरी आइतबार नै सम्पन्न एभरेष्ट कलेज अफ मेडिकल साइन्सेज प्रा.लि.को १६ औं वार्षिक साधारण सभा अन्तर्गत सम्पन्न निर्वाचनमा आगामी कार्यकालका लागि निर्देशकमा रमेश शर्मा, खुमा प्रसाद अर्याल, लोकहर्ष शाक्य, सीताराम तिमल्सिना, परिक्षित खेम्का र डा.हेमन्त कुमार हलुवाई र श्रेयास अग्रवाल निर्विरोध निर्वाचित भएका छन् । त्यस्तै कलेजको पहिलो सञ्चालक समितिको बैठकले अध्यक्षमा रमेश शर्मा र प्रबन्ध निर्देशकमा खुमा प्रसाद अर्याललाई सर्वसम्मतिले चयन गरेको छ ।