खोज

बुटवल, २२ पुस ।

गुल्मीका एक पाँच वर्षीय बालक ब्लड क्यान्सरसँग लडिरहेका छन् । छत्रकोट गाउँपालिका–दौंगा नौधारा निवासी तेज बस्नेत र अनिता बस्नेतका छोरा एरिक बस्नेतलाई ५ बर्षको बाल्याबस्थामै घातक रोग ब्लड क्यान्सर भएको हो ।

जीवन र मृत्युको दोसाँधमा संघर्ष गरिरहेका बालकको उपचारका लागि परिवारले सबैसँग अपिल गरेका छन् ।

बालकको उपचारको लागि लाखौं रकम आवश्यक पर्ने भएपनि परिवारको आर्थिक अवस्था भने दयनीय छ । उनको उपचारको लागि लाग्ने खर्च जुटाउन समस्या भएकोले यो कठिन परिस्थितिको सामना गर्न सम्पूर्ण क्षेत्रबाट सहयोगको आशा परिवारले गरेका छन् ।

एरिक बस्नेतको बालापनको उज्यालो भविष्य अँध्यारो रोगको चपेटामा परेपछि उनको उपचारले परिवारलाई आर्थिक संकटमा पुर्याएको छ । जीवन र मृत्युसँग पाइलापिच्छे लडिरहेका एरिकको लागि एकताबद्ध भएर सहयोगको हात फैलाउनुपर्ने बेला आएको उनका छिमेकीहरु बताउँछन् ।

“दुःखका दिनमा दिएको सहयोग साँचो मानवताको चिनारी हो” भन्ने मान्यतालाई आत्मसात् गर्दै एरिकको जीवन बचाउन सबैको सहयोग आवश्यक रहेको स्थानीयको भनाइ छ ।

उपचारको लागि सहयोग गर्न एरिकको बुबा तेज बस्नेतको सम्पर्क नम्बर ९८४७१६६३२८ र आमा अनिता बस्नेतको सम्पर्क नम्बर ९८६९०६५४९९ मा सिधै सम्पर्क गर्न पनि परिवारले आग्रह गरेको छ ।