खोज

सल्यान, २१ पुस ।

सल्यानका भूकम्प प्रभावित १९३ घरपरिवारलाई जीविकोपार्जनका लागि नगद अनुदान उपलब्ध गराइएको छ । नेपाल रेडक्रस सोसाइटीले जिल्लाको दार्मा गाउँपालिकाका भुकम्प पीडितहरुको लागि जीविकोपार्जनका कार्यक्रम सञ्चालन गरेको हो । भूकम्प प्रभावित विपन्न किसानहरूको लागि जीविकोपार्जनमा सहयोग पु¥याउने उद्देश्यले सशर्त अनुदानमार्फत कार्यक्रम सञ्चालन गरिएको नेपाल रेडक्रस सोसाइटी जिल्ला शाखा सल्यानका कार्यक्रम संयोजक जगत तामाङले जानकारी दिए ।

जीविकोपार्जन कार्यक्रमअन्तर्गत गाउँपालिकाका ६ वटा वडाका १ सय ९३ घरपरिवारलाई प्रतिव्यक्ति रु. ५० हजारका दरले नगद अनुदान प्रदान गरिएको उनको भनाई छ । उनका अनुसार अनुदान कार्यक्रम अन्तर्गत लाभग्राहीहरूले कुल ९६ लाख ५० हजार रुपैयाँ प्राप्त गर्नेछन् । पहिलो किस्तामा प्रतिव्यक्ति रु. २५ हजार वितरण भइसकेको छ भने दोस्रो किस्ताका लागि अनुगमन प्रक्रिया जारी रहेको तामाङले जनाए । अनुदान प्राप्त गर्ने लाभग्राहीहरूले विभिन्न व्यवसाय सञ्चालन गरेका छन् ।

बाख्रा पालनमा १२८ जना, भैंसी पालनमा ३७ जना, सिलाई कटाईमा ८ जना, किराना पसलमा ७ जना, आरण उद्योगमा ४ जना, कुखुरा पालनमा ४ जना, कुटानी पिसानीमा २ जना, खाजा नास्ता होटलमा १ जना, तरकारी खेतीमा १ जना र तरकारी तथा फलफूल पसलमा १ जना संलग्न भएका छन ।

भूकम्प पीडित दार्मागाउँपालिका ५ का विरेन्द्र प्रकाश खड्काले जिविकोपार्जन कार्यक्रमले राहत भएको भन्दै पीडित परिवारले आयआर्जनका कार्य सुरु गरेको जनाए । सोही वडाका पदमी कामीले किराना पसल सुरु गरेको र त्यसवाट आफुलाई आयआर्जनको लागि सहयोग पुगेको बताइन् ।

भूकम्प प्रभावितहरुलाई प्रदान गरेको रकमवाट बाख्रापालन गर्ने किसानहरुले तीन वटा सम्म बाख्रा किन्ने तथा गोठ र खोर आफैले बनाउने छन् भने भैसीपालन गर्ने किसानले केही रकम आफुले थपेर लैनौ भैसी किन्नुपर्ने छ । कार्यक्रम संयोजक तामाङले भूकम्प प्रभावितले पेसा व्यवसायमा सहयोग पुगोस् र जीविकोपार्जनमा टेवा पुगोस भन्ने उद्देश्यले सशर्त अनुदान रकम प्रदान गरिएको बताए ।

रेडक्रसको यो पहलले विपन्न किसानहरूलाई आत्मनिर्भर बन्न र आफ्नो जीविकोपार्जन सुधार गर्न मद्दत पुगेको दार्मा गाउँपालिकाका अध्यक्ष निम बहादुर केसीले बताए । उनका अनुसार अनुगमन गरेर भुकम्प प्रभावित मध्य पनि अति विपन्न परिवारलाई छनोट गरेर यो कार्यक्रममा जोडिएको छ । भुकम्पले धेरैको घर बास गुमेकाले क्षतिपूर्ति स्वरुप यो कार्यक्रम सञ्चालनले उनीहरुको आयआर्जन र पेसा व्यवसायमा ठूलो सहयोग पुगेको गाउँपालिका अध्यक्ष केसीको भनाइ छ ।