खोज

बुटवल, २० पुस ।

लुम्बिनी निर्माण व्यवसायी संघ रुपन्देहीले आगामी माघ २६ गते १८ ओं साधारण सभा आयोजना गर्ने तयारी गरेको छ । शनिबार संघको कार्यालय भैरहवामा बसेको कार्यसमिति बैठकले साधारण सभाको मिति तय गरेको हो । संघका अध्यक्ष मञ्जु भुसालको अध्यक्षतामा बसेको बैठकले आगामी साधारण सभाका लागि सम्पूर्ण जिम्मेवारी सहित तयारीलाई अन्तिम रूप दिइएको अध्यक्ष भुसालले बताइन् ।

साधारण सभालाई सफल बनाउन विभिन्न उपसमितिहरूको गठन गरिएको छ । अध्यक्ष भुसालको संयोजकत्वमा गठित उपसमितिहरूले आफ्नो जिम्मेवारी सम्हाल्दै सभाको तयारीलाई तीव्र बनाउने संघका महासचिव प्रितम रौनियारले बताए । संघका कोषाध्यक्ष यजनय बेलवासे आर्थिक संयोजक, महासचिव प्रितम रौनियार प्रचार प्रसारको संयोजक, वरिष्ठ उपाध्यक्ष रमेश बेलबासे आतिथ्य सत्कार र आवास व्यवस्थापनको जिम्मेवारीमा, पुरस्कार तथा मायाको चिनोको जिम्मेवारी सचिव राजन ज्ञवाली, मंच व्यवस्थापन सदस्य टिका शर्मा पराजुली, प्रेस संयोजकको जिम्मेवारी रिया बस्नेत क्षेत्रीलाई, स्वास्थ्य संयोजक सतिस मिश्रा, सुरक्षा र पार्किङ व्यवस्थापन सुवम रौनियारलाई दिइएको छ भने सोही संस्थाका सल्लाहकार सफिक अहमद खानलाई पूर्वअध्यक्ष सम्मान संयोजकको रूपमा जिम्मेवारी दिइएको छ ।

अध्यक्ष भुसालले लुम्बिनी निर्माण व्यवसायी संघ रुपन्देहीको १८ औं साधारण सभालाई सफल बनाउनका लागि सबै पदाधिकारी र सदस्यहरूलाई सक्रिय रूपमा सहभागी हुन अनुरोध गरेकी छन् । संघको समृद्धिको लागि गरिएको प्रयासलाई सफल बनाउन सबैको सहकार्यको आवश्यकता रहेको उनले बताइन् । “हामीले यस सभामा नयाँ दिशाहरू र योजना प्रस्तुत गर्नेछौं जसले निर्माण व्यवसायीको भविष्यमा अझ बढी सशक्त र सफल बनाउनेछ। सामूहिक मेहनत र सहयोगले संघलाई नयाँ उचाइमा पुर्याउन सक्नेछ,“ अध्यक्ष भुसालले भनिन् ।