खोज

गुल्मी २० पुस ।
गुल्मीको छत्रकोट गाउँपालिकाले पर्यटन प्रबद्र्धनका लागि जिपलाइन सेवा सञ्चालनमा ल्याएको छ । पालिकाले जिल्लामा पहिलो पटक सञ्चालनमा ल्याएको साहसिक खेल जिपलाईनको सेवासँगै त्यस क्षेत्रका नागरिकहरू यतिबेला जिपलाईन चढेर रामाईलो अनुभव बटुल्न थालेका छन ।
गाउँपालिकाले जिल्लाको पबित्र धार्मिक स्थल छत्रकोटको देवालय मन्दिर र देविस्थान मन्दिरलाई जोड्नेगरि जिपलाईन सेवा सञ्चालनमा ल्याएको छत्रकोट गाउँपालिका अध्यक्ष रामप्रसाद पाण्डेले बताए । जिल्लाको आन्तिरक पर्यटन प्रबद्र्धनका लागि सहयोग पुराउने उद्देश्यले छत्रकोटमा जिपलाईन सेवा सञ्चालन भएपनि यो जिल्लावासी सबैको साझा सम्पति भएको अध्यक्ष पाण्डेले बताएका छन ।
गाउँपालिकाले ‘रुरु रेसुङ्को धार्मिक आस, छत्रकोटमा बसौं वास’ भन्ने नीति लाई अघि सारेर छत्रकोटलाई पर्यटकीय गन्तव्य निर्माण कार्यमा जुटेको छ । पछिल्लो समयमा जिल्लामा आउने वाहय पर्यटकहरूसँगै जिल्लामा रहेका आन्तरिक पर्यटकहरूलाई लक्षीतगरि पहिलो पटक सञ्चालनमा ल्याईएको जिपलाईन सेवाले जिल्लाको पर्यटन पबद्र्धनका लागि थप सहयोग पुराउने जिल्ला समन्वय समिति गुल्मीका प्रमुख द्रोणबहादुर खत्रीले बताए ।
छत्रकोट गाउँपालिका –३ स्थीत छत्रकोट देवालय मन्दिरदेखि भगवती मन्दिर लुम्छासम्म पुग्नेगरि जिपलाइनको निर्माण गरिएको हो । गत आर्थिक वर्षबाट निर्माण सुरु गरिएको जिपलाइनको निर्माण कार्य तोकिएको समयावधि अघि निर्माण सम्पन्न गरिएको थियो । जिपलाइनको १ हजार ८० मिटर लम्बाई र ६७ मिटरको उचाई रहेको छ ।
जिपलाइनमा औषत १५ देखि २० मिटर प्रतिसेकेन्डमा तौल अनुसारको गति रहेको बताईएको छ । सुरु स्टेशनदेखि ल्याण्डीङ्हुने स्टेशनसम्म पुग्न करिब एक मिनेट लाग्दछ । ८६ लाख ७३ हजार रूपैयाँ लागतमा जिपलाइनको निर्माण सम्पन्न भएको हो । लुम्बिनी प्रदेश सरकार र छत्रकोट गाउँपालिकाको समपुरक बजेटमा निर्माण गरिएको उक्त जिपलाईनको निर्माण कार्य सानु सेतीदेवी कन्ट्रक्सन प्रालिले गरेको थियो ।
जिपलाइन चढनको लागि छत्रकोटवासीहरूको लागि ४ सय रूपैयाँ, विद्यार्थीहरूको लागि ३ सय रूपैयाँ, छत्रकोट बाहिरका नागरिकको लागि ५ सय रूपैयाँ र विदेशी नागरिकहरूको लागि १ हजार ५ सय रूपैयाँ शुल्क निर्धारण गरिएको प्रमुख प्रशासकीय अधिकृत रुद्रहरी पुरीले जानकारी दिए ।
जिल्लाका १२ वटै स्थानीय तह एवं छिमेकी जिल्लाका पालिका प्रमुखहरूको सहभागितामा जिपलाइन सेवा शुभारम्भ गरिएको थियो । जनप्रतिनिधिहरूले पनि साहसिक खेल जिपलाइन चढेर रमाइलो अनुभव गरेका थिए । पालिकाले यतिबेला पर्यटन प्रवद्र्धनका लागि धार्मिक, साँस्कृतिक एवं पुरातात्विक महत्व बोकेका स्थलहरूको संरक्षण र संवद्र्धनको क्षेत्रमा महत्वपूर्ण काम गर्दै आईरहेको छ ।