लमही , पुस १९
थारु समुदायको कला, संस्कृति र परम्पराको संरक्षण तथा प्रवर्द्धन गर्ने उद्देश्यले दाङमा माघ सांस्कृतिक महोत्सव सुरु भएको छ। लुम्बिनी प्रदेशका मुख्यमन्त्री चेतनारायण आचार्यले शुक्रबार महोत्सवको उद्घाटन गरेका छन।
मुख्यमन्त्री आचार्यले थारु समुदायको प्रदेशका हरेक निकायमा १४ प्रतिशत प्रतिनिधित्व सुनिश्चित गरिएको जानकारी दिए। “प्रदेश निजामती सेवा ऐनले थारु समुदायको प्रतिनिधित्व सुनिश्चित गरेको छ, अब नियमावली बनाएर कार्यान्वयनमा लैजानेछौं,” उनले भने” । साथै, प्रदेशमा बोलीचालीका भाषाहरूलाई सरकारी कामकाजको भाषा बनाउने प्रतिबद्धता पनि व्यक्त गरे।
मुख्यमन्त्रीले थारु समुदायका कला र संस्कृतिलाई आर्थिक विकाससँग जोड्न प्रदेश सरकारले प्राथमिकतामा राखेको बताए। “थारु संग्रहालय निर्माणमा प्रदेश सरकारको सहयोगले समुदायको सांस्कृतिक पहिचान संरक्षणमा टेवा पुर्याएको छ,” उनले भने।
महोत्सवका मुख्य आकर्षणहरू थारु नृत्य र हस्तकला प्रदर्शन ,थारु परिकारहरू माछा, घोंगी, गँगटा, सुँगुरको मासु, मुसाको मासु, ढिक्री, अनदीको रोटी लगायत रहने छन।
महोत्सव अवधि: पुस २० गतेसम्म चल्ने छ। “आर्थिक जागरण र सांस्कृतिक रुपान्तरण हाम्रो अभियान, सामाजिक न्यायसहित समृद्धिमा हाम्रो योगदान” भन्ने नारासहित आयोजित महोत्सवमा थारु कल्याणकारीणी सभाका आयोजनामा मेला सुरु भएको हो ।
कार्यक्रमलाई उद्योग, पर्यटन तथा यातायात व्यवस्था मन्त्री प्रचण्ड विक्रम न्यौपाने, ऊर्जा, जलस्रोत तथा सिँचाइ मन्त्री सीता शर्मा चौधरी, घोराही उपमहानगर प्रमुख नरुलाल चौधरीलगायतले सम्बोधन गरेका थिए।
थारु कल्याणकारीणी सभाले महोत्सवको अवसरमा मुख्यमन्त्रीलाई १० बुँदे ज्ञापनपत्र बुझाएको छ। ज्ञापनपत्रमा थारु भाषालाई सरकारी कामकाजको भाषा बनाउनुपर्ने, थारु समुदायको मतहवा परम्परालाई कानूनी मान्यता दिनुपर्ने लगायतका माग समेटिएका छन्।
२८ मंसिर २०८२, आइतबार
