खोज

काठमाडौं ।

अमेरिकी सहायता परियोजना मिलेनियम च्यालेन्ज कर्पोरेशन (एमसीसी) ले नेपालमा कार्यान्वयन भइरहेको परियोजनाका लागि ६ अर्ब ८० करोड रुपैयाँ अतिरिक्त सहायता रकम प्रदान गर्ने घोषणा गरेको छ। यो रकम एमसीसी र नेपाल सरकारको लागत साझेदारीमा गत २०८० साल भदौदेखि शुरु भएको रु ९२ अर्ब बराबरको परियोजना अन्तर्गत प्राप्त हुनेछ।

एमसीसी सञ्चालक समितिले नेपाल कम्प्याक्टका लागि थप पाँच करोड अमेरिकी डलर (लगभग ६ अर्ब ८० करोड रुपैयाँ) को स्वीकृति दिएको जनाएको छ। एमसीसीको बोर्डको यो निर्णयले नेपाल सरकारसँगको साझेदारीलाई अझ मजबुत बनाउने र नेपालको विकास प्राथमिकताहरूलाई रूपान्तरणकारी र उच्च गुणस्तरीय पूर्वाधार परियोजनाहरूसँग लागू गर्न मद्दत पुर्याउने विश्वास व्यक्त गरेको छ।

एमसीसी कम्प्याक्ट अपरेशनका उपाध्यक्ष क्यामरन अल्फोर्डले यो अतिरिक्त रकमले नेपालको विद्युत् प्रसारण सञ्जाललाई सुदृढ गर्न मद्दत पुर्याउने र दीर्घकालीन आर्थिक वृद्धिका साथै एमसीसी कम्प्याक्टको सफलता सुनिश्चित गर्न योगदान पुर्याउने विश्वास व्यक्त गरेका छन्।

यस परियोजना अन्तर्गत ४०० केभीको डबल सर्किट ३१५ किलोमिटर लामो विद्युत् प्रसारण लाइन निर्माण गरिनेछ। यो प्रसारण लाइन काठमाडौंको लप्सीफेदी र नुवाकोटको रातमाटेमा स्थित सबस्टेशन, मकवानपुर, धादिङ, तनहुँ, पाल्पा, चितवन, नवलपरासी हुँदै भारतको महेशपुरसम्म जोडिनेछ। प्रसारण लाइन निर्माणपछि नेपाल र भारतबीच तीन हजार मेगावाट बिजुली आदानप्रदान सम्भव हुनेछ।