खोज

बुटवल, १८ पुस । प्रत्येक वर्ष अग्रेजी नया वर्षमा सडक महोत्सव गर्दै आएका रुपन्देहीका होटल ब्यवसायीहरुले यस वर्ष भने माघि मेला आयोजना गर्ने भएका छन । बुटवल उपमहानगरपालिकाको संरक्षकत्व, लुम्बिनी प्रदेश सरकार, पर्यटन ग्रामीण विकास तथा शहरी विकास मन्त्रालय पर्यटन विकास परिषद बुटवल प्रवद्र्धक र रुपन्देही होटल तथा रेष्टुरेन्ट व्यवसायी संघको आयोजनामा पुस २९ देखि माघ २ गतेसम्म बुटवलमा तीन दिने खाना महोत्सव तथा माघी मेला २०८१ आयोजना हुने भएको हो ।

‘नेपाली मौलिक संस्कृति र स्थानिय खानाका परिकारको हाम्रो शान, शहरदेखि गाउँसम्मको पर्यटन प्रवद्र्धन र विकास हाम्रो अभियान’ भन्ने नारासहित हुने यो महोत्सव सिद्धेश्वर माविको मैदान परिसरमा गरिने संघका अध्यक्ष अध्यक्ष लेखनाथ भण्डारीले बताए । हरेक वर्ष अग्रेजी नया वर्षमा सडक महोत्सव गदै आएकोमा यसपटक तराईबासी थारु जाती र संस्कृति, गुरुङ, मगर जातीहरुको विशेष चाडको रुपमा मनाईदै आएको माघी पर्वलाई प्रवद्र्धन गर्न वृहत माघि कार्यक्रम गर्न लागेको उनले बताए । कार्यक्रमबाट स्थानीय खानाका परिकार, मौलिक संस्कृति, र पर्यटन प्रवद्र्धनमा महत्वपूर्ण योगदान पुग्ने उनले दाबी गरे । महोत्सवमा स्थानीय थारू, मगर, नेवार र अन्य समुदायका परम्परागत खानाका परिकारकोे प्रदर्शनी र विक्री गरिने उनले बताए । यसैगरि थारू नाच, लोकदोहोरी र विभिन्न जातजातिका मौलिक र सांस्कृतिक नृत्यहरुका साथै पर्यटन प्रवद्र्धन हुने लुम्बिनी प्रदेशका प्रमुख पर्यटकीय गन्तव्यहरूको जानकारी दिने स्टलहरु राखिने उनले बताए ।

महोत्सवमा स्थानिय तथा राष्ट्रिय कलाकारको प्रस्तुतिसहितको हरेक दिन सास्कृतिक कार्यक्रम समेत रहने महोत्सवका संयोजक तथा संघका महासचिव अर्जुन थापाले बताए । दैनिक रुपमा रुपन्देहीका दोहरी साझका कलाकारहरुको प्रस्तुति, नृत्य, डिजे, हास्य कलाकारको मनोरन्जन समेत रहने उनले बताए । यसैगरि पर्यटन प्रवद्र्धनका लागि एक दिने वृहत सरोकारवालासंग गोष्ठी आयोजना गरिने भएको छ । महोत्सवमा ५ दर्जन स्टलहरुमा बढी खानाका परिकारहरुको स्टलहरु रहने स्टल बुकिङ्ग संयोजक संस्थाका सचिव थम्मन बहादुर भण्डारीले बताए ।