खोज

बुटवल, १६ पुस ।
“तमु थात थलोको सरक्षण र सम्बर्धनका लागि मौलिक पहिचानको आहवान, सरकारी कामकाजी भाषा तमु भाषा घोषणका लागि तमुवानको आन्दोलन” भन्ने मुल नाराका साथ तमु ह्युल छोज धि गुरुङ राष्ट्रिय परिषद रुपन्देहीले गुरुङहरुको महान पर्व सप्र्हि ल्हो(सर्प वर्ग)२०८१ ल्होसार भव्य रुपमा सम्पन्न गरेको छ ।

कार्यक्रमको उदघाटन बुटवल उपमहानगरपालिका प्रमुख खेलराज पाण्डेले गरेका थिए । त्यस अवसरमा उनले ल्होसार पर्वले गुरुङ जातिहरुको भाषिक पहिचान भेषभुषा, संस्कार, संस्कृतिलाई जोगाई राखेको र यी यस्ता कार्यक्रमले पक्कै पनि जातीय भाषिक पहिचानमा टेवा पुग्ने बताए । स्थानीय सरकारले आदिवासी जनजातिका भाषिक पहिचान गर्न तालिमका लागि बजेट छुट्ट्याएकाले त्यसलाई सहकार्य गरेर उपयोग गर्नु पर्ने र अब स्थानीय सरकारको नागारिक बडा पत्रमा गुरुङ भाषालाई राख्नका लागि गुरुङ समुदायबाट नै पहल गर्नु पर्ने उनले बताए ।

गुरुङ समुदायबाट आफू पनि एकदमै नजिक रहेकाले पछिल्ला पुस्ताले यी यस्ता संस्कार , संस्कृतिहरुलाई संरक्षण गर्दै लैजानु पर्ने पाण्डेले बताए । हामी सबैले सबैको संस्कार,संस्कृतिलाई सम्मान गर्नु पर्ने र गुरुङहरुको मृत्यु पश्चायत अन्त्येष्टि गरिने समाधी स्थल गुरुङ डांडा पुग्ने बाटो निर्माणका लागि उपमहानगर पालिकाबाट अघिल्लो बर्ष केही बजेट बिनियोजित गरेको पनि नगरप्रमुख पाण्डेको भनाइ छ ।

कार्यक्रममा तमु ह्युल छोज् धि गुरुङ राष्ट्रिय परिषदका केन्द्रीय सदस्य एवं लुम्बिनी प्रदेश प्रमुख झप्पट गुरुङ, नेकपा बिप्लव समुहका जिल्ला अध्यक्ष बिरेन्द्र सिंह, जसपाका जिल्ला कोषाध्यक्ष सुनिता खडलु, नेपाल कम्युनिष्ट पार्टी एमालेका जिल्ला उपसचिव बाबुराम पन्थी, गुरुङ राष्ट्रिय परिषदका केन्द्रीय सदस्य दिपक गुरुङ, सल्लाहकार अशोक गुरुङ, नगर समितिका अध्यक्ष बुद्धि प्रसाद गुरुङ लगायतले शुभकामना मन्तव्य राखेका थिए । कार्यक्रममा राष्ट्रिय लोक दोहोरी गायक मिलन गुरुङको साङ्गितिक प्रस्तुतीका साथै स्थानीय कलाकारहरुले गुरुङ गितमा नृत्य प्रस्तुत गरेका थिए ।

परिषदका जिल्ला अध्यक्ष बिमला गुरुङ र तमु ह्युल छोज धि गुरुङ राष्ट्रिय परिषदका केन्द्रीय सदस्य एवं लुम्बिनी प्रदेश प्रमुख झप्पट गुरुङ, केन्द्रीय सदस्य दिपक गुरुङले कार्यक्रमलाई सफल बनाउन सहयोग गर्ने समाजसेविहरुलाई खादा र प्रमाण पत्रले सम्मान गरिएको थियो ।

तमु ह्युल छोज धि गुरुङ राष्ट्रिय परिषद बुटवल नगर समितिले छात्रवृत्ति सहयोगार्थ खोलिएको भाग्यशाली राफल चिठ्ठामा ३२ हजार राशीको प्रथम पुरस्कार एलइडि.टि भि इट्टाभट्टिका सानु गुरुङले प्राप्त गरेका छन् । कार्यक्रममा जिल्ला अध्यक्ष बिमला गुरुङ, उपाध्यक्ष गंगा गुरुङ, सचिव आशा गुरुङलगायतले पनि आफ्नो धारणा राखेका थिए ।

त्यसैगरी गुरुङहरुको धार्मिक संस्था तमु प्ये ल्हु संघ बुटवल नगर समितिले पनि गुरुङहरुको महान पर्व सप्र्ही ल्हो (सर्प बर्ग)३२२७७ औ तमु ल्होसार २०८१ बेलबास– १५ पहेले भित्तामा रहेको धार्मिक संस्था कोँहिबो धीँ प्राङ्गणमा विविध गुरुङ संस्कार, संस्कृती झल्किने साँस्कृतिक कार्यक्रम सहित भव्य रुपमा सम्पन्न गरेको छ ।