खोज

बुटवल, १५ पुस । खेल र खेलाडीहरुलाई प्रोत्साहन गर्दै विभिन्न खेलकुद गतिविधि गर्दै आएको मदन भण्डारी स्पोर्टस् एकेडेमीले आफनो १६ औं स्थापना दिवस विविध कार्यक्रम गरि मनाउने भएको छ । स्थापना दिवसकै क्रममा बुटवलमा आयोजना हुने मदन भण्डारी गोल्डकप ईन्डो नेपाल रनिङ्गशिल्ड पुरुष भलिवल च्याम्पियनसीप २०८१ को तयारी पुरा भएको छ ।

बुटवलस्थित रामनगर खेलमैदानलाई अस्थाई प्याराफिटसहित आर्कषक सजावटको काम तिब्र गतिमा गरिएको छ । पौष १७ देखि २४ गतेसम्म आयोजना हुने प्रतियोगितामा उपाधि विजेता टिमले नगद सात लाख रुपैयासहित ट्रफी, मेडल र प्रमाणपत्र प्राप्त गर्ने एकेडेमीका अध्यक्ष ध्रुव आचार्यले बताए । यसैगरि उपविजेता टिमले नगद तीन लाख पचास हजार, तृतीय टिमले नगद एक लाख पचहत्तर हजार तथा सान्त्वना टिमले नगद एक लाख रुपैयासहित ट्रफी, मेडल र प्रमाणपत्र गर्ने उनले बताए । प्रतियोगिताको उत्कृष्ट खेलाडीलाई पच्चिस हजार रुपैया तथा विभिन्न बिधामा रुपमा समेत पुरस्कृत गरिने उनले बताए । पुस १६ गते बुटवलमा प्रतियोगिताको ट्रफी सार्वजनिक गरिने उनले बताए ।

प्रतियोगितामा आयोजक मदन भण्डारी स्पोर्टस एकेडेमीसहित विभागिय टिम त्रिभुवन आर्मी क्लव, नेपाल पुलिस क्लव, एपीएएफ क्लव, मणिमुकुन्द भलिबल क्लव, भारतको गुजरात स्टेट भलिवल एशोसिएशन, गलकोट भलिबल क्लव, रुकुम पश्चिम भलिवल प्रशिक्षण केन्द्र गरि नेपाल र भारतका आठ वटा टिमले प्रतिष्पर्धा गर्नेछन । प्रतियोगिताको उद्घाटन प्रधानमन्त्री केपी शर्मा ओलीबाट हुने भएको छ ।