खोज

बर्दघाट, १३ पुस ।

बर्दघाट नगरको पर्यटन प्रवद्र्धनको लागि सरोकारवालाहरुले राय सहित माग गरेका छन । बर्दघाट उद्योग वाणिज्य सँघको आयोजना र बर्दघाट प्रेस क्लवको समन्वयमा आठौँ बर्दघाट महोत्सवको अवसर पारी बर्दघाट नगरमा पर्यटन प्रवद्र्धन विषयक गोष्ठीमा बोल्दै सरोकारवालाहरुले बर्दघाटको विकासको लागि पर्यटन प्रवद्र्धनको आवश्यकता औल्याएका हुन ।

कार्यक्रममा लुम्बिनी विकास कोषका कोषाध्यक्ष ढुण्डीराज भट्टराई (सिद्धिचरण)ले स्थानीय भौगोलिक अवस्था अनुसारका पर्यटन विकासको सम्भावनालाई अनुसन्धान गरी निजी क्षेत्रसँग सहकार्य गरी अगाडि बढ्नु पर्ने बताए ।

उनले बुद्धकालीन राज्य संरचनाका अनुसारको नक्साङ्कका आधारमा लुम्बिनी बिकास कोषसँग जोडिएर पर्यटन क्षेत्रको विकासमा जोडिन आग्रह गरेका थिए ।

नगर प्रमुख शम्भुलाल श्रेष्ठले पर्यटन विकासका लागि नगर निजी क्षेत्रसँग हालेमालो गरी अगाडि बढ्न चाहेको उल्लेख गरेका थिए । नगर, प्रदेश, संघ र निजी क्षेत्रसँग सहकार्य गरी अगाडि बढ्ने श्रेष्ठले बताए ।

पर्यटन विकासका लागि नगरले पार्क, बुद्ध मगल ताल, सिमसार लगायतका क्षेत्रको विस्तृत परियोजना रिपोर्ट (डिपीआर) तयार पारिएको श्रेष्ठको भनाइ थियो । बर्दघाट नगरले पर्यटन विकासमा रहेर काम गरिरहेको उल्लेख गर्दै नगर उपप्रमुख रुद्र प्रकाश उपाध्यायले नगरले नमुना उन्मुख वडा बनाएको बताए । “नमुना उन्मुख वडाका लागि २५ लाख छुट्याइएका छौं । यसले पर्यटनमा लगानी गर्न सकिन्छ” उपाध्यायले भने ।

त्यस्तै बर्दघाट नगरपालिकाका प्रमुख प्रशासकीय अधिकृत प्रकाश खनालले जनसाझेदारीमा मोडलमा कार्यक्रमहरु तर्जुमा गरी कार्यान्वयन गर्नु पर्ने धारणा राखेका थिए । खनालले पर्यटन क्षेत्रमा लगानी ठुलो हुने र नगरसँग स्रोत कम हुने हँुदा नगरको मात्रै बजेटले विकास गर्न कठिन भएको बताएका थिए ।

कार्यक्रममा बोल्दै बर्दघाट ४ का वडा अध्यक्ष बेदबिना तिवारी, पत्रकार गोपी ज्ञवाली, दिव्यज्योति बहुमुखी क्याम्पसका क्याम्पस प्रमुख सागरमणि पाण्डेय, वाउन्न घोला सिमसार मञ्चका अध्यक्ष कुलदेव श्रेष्ठ, कन्चन गढी विकास समितिका निवर्तमान अध्यक्ष चन बहादुर गाहागायतले बोल्दै नगरमा पर्यटनको विकासका लागि एकीकृत योजना आवश्यक रहेकोमा जोड दिएका थिए ।

उनीहरुले अभियानकै रुपमा क्षेत्रगत योजना बनाएर होमस्टे, ऐतिहासिक धार्मिक तथा पुरातात्विक क्षेत्र, विभिन्न जातजातिका धार्मिक तथा साँस्कृतिक पहिचान झल्किने खाले योजनालाई प्राथमिकताका साथ नगर अगाडि बढ्नु पर्नेमा जोड दिएका थिए ।

त्यस्तै नवलपरासी होटल व्यवसायी संघका उपाध्यक्ष भरत कंडेल, रोयल कटेज प्रा.लि.का सञ्चालक बलराम भण्डारीले बोल्दै वर्दघाटमा पर्यटकलाई वन नाइट स्टे गराउँदै बर्दघाटका पर्यटकीय क्षेत्रको अवलोकन गर्ने वातावरण सृजना गर्न सम्पुर्ण पक्षहरु लाग्नु पर्ने धारणा राखेका थिए । होटल व्यवसायमा बाह्य पर्यटक आउँदा भाषागत समस्या रहेकाले सवारी चालक र होटल व्यवसायीलाई भाषागत तालिमको आवश्यकता रहेको औल्याएका थिए ।