खोज

काठमाडौँ।

शिक्षा, विज्ञान तथा प्रविधि मन्त्रालयले विदेश अध्ययनका लागि जाने विद्यार्थीहरूलाई लक्षित गरेर फैलाइँदै गरेको भ्रामक सामग्रीको प्रसारण नगर्न शैक्षिक परामर्शदाता निकायहरूलाई अनुरोध गरेको छ। मन्त्रालयले सार्वजनिक गरेको सूचनामा जथाभाबी प्रचार सामग्री जस्तै “फ्री भिसा”, “भिसा सुनिश्चितता”, “अत्यधिक छुट”, “कामको ग्यारेन्टी” लगायतका विज्ञापनहरूलाई भ्रामक र व्यावसायिक आचरण विपरीतका ठहर गरेको छ।

शिक्षा मन्त्रालयको शैक्षिक परामर्श तथा प्रमाणीकरण शाखाका प्रमुख सेमन्तराज कोइरालाले सामाजिक सञ्जालमा यस्ता भ्रामक विज्ञापनहरू देखिन थालेपछि सूचना जारी गर्नुपरेको जानकारी दिएका छन्। मन्त्रालयको अनुसार, परामर्श दिने संस्थाले प्रचार सामग्रीमा आफ्नो दर्ता नम्बर, अनुमति नम्बर, सम्पर्क ठेगाना, देश, विश्वविद्यालय, कलेज, विषय, अवधि, लागत, मान्यता, स्तर लगायतका विवरण स्पष्ट रुपमा राख्नुपर्नेछ। यदि यस्तो सामग्री बिना प्रचार गरिएको पाइयो भने, कारबाही हुने चेतावनी दिइएको छ।

मन्त्रालयको तथ्याङ्कअनुसार, चालू आर्थिक वर्षको पहिलो पाँच महिनामा ७२ हजार ३१२ जनाले विदेश पढ्न जानका लागि “नो अब्जेक्शन लेटर” (एनओसी) लिएका छन्। गत आर्थिक वर्ष २०८०/८१ मा १ लाख ८८ हजार ६ सय ६१ जना विद्यार्थी विदेश पढ्न गएका थिए र नेपाल राष्ट्र बैंकका अनुसार एक खर्ब २५ अर्ब १३ करोड रुपैयाँ बाहिर गएको छ। मन्त्रालयले विद्यार्थीहरूलाई यस्ता भ्रामक प्रचारबाट ठगिनबाट जोगाउन सचेत गराउने काम गरिरहेको छ।