खोज

लमही, १० पुस ।
लुम्बिनी प्रदेशका सरकारी स्वास्थ्य संस्थाहरूमा रेबिजविरुद्धको खोप अभाव देखिएको छ । प्रदेश स्वास्थ्य आपूर्ति केन्द्रमा स्टक सकिएपछि राप्ती प्रादेशिक अस्पताल तुलसीपुर, लमही अस्पताल सहित १२ जिल्लाका अस्पताल तथा प्राथaमिक स्वास्थ्य केन्द्रमा खोप आपूर्ति ठप्प भएको हो ।
सरकारले ४० स्वास्थ्य संस्थामा रेबिजविरुद्धको खोप वितरण गर्दै आएको भए पनि लुम्बिनी प्रदेशको आपूर्ति केन्द्रले मागअनुसार खोप उपलब्ध गराउन नसकेको बताइएको छ। खोप शाखा प्रमुख हरि आचार्यका अनुसार, माग उच्च भए पनि खोपको मौज्दात अभावले वितरण असम्भव भएको छ । गत वर्ष लुम्बिनी प्रदेशमा १,१६० मात्रा एन्टिरेबिज खोप आएको थियो भने अघिल्लो वर्षको १२, १२५ मात्रासहित केही समय वितरण गरिएको थियो । तर, यो खोप कात्तिक दोस्रो सातापछि समाप्त भएको छ ।
प्रदेशभरका ४० स्थानमा वार्षिक ६९,२४० मात्राको आवश्यकता पर्छ, तर मागअनुसार आपूर्ति हुन नसक्दा सरकारले निःशुल्क उपलब्ध गराउँदै आएको उक्त खोप स्थानीयले निजी स्वास्थ्य संस्थाबाट महँगोमा किन्नुपर्ने बाध्यता भएको गुनासो गरेका छन ।
सरुवा रोग नियन्त्रण महाशाखाका निर्देशक डा. यदुचन्द्र घिमिरेले गत वर्ष किनेको खोप स्टक सकिएको र यस वर्ष खरिद प्रक्रियामा ढिलाइ भएको जानकारी दिए । खोप अभाव हुनुको कारणमा आवश्यकता नभएका व्यक्तिहरूले पनि खोप लगाउनाले चाँडो खपत भएको उनले उल्लेख गरे।यस वर्षका लागि खोप खरिदमा दोब्बर बजेट विनियोजन गरिए पनि आपूर्ति प्रक्रिया अविलम्ब तीव्र पार्नुपर्ने आवाज उठेको छ ।