खोज

चन्द्रौटा (कपिलवस्तु), ९ पुस ।

कपिलवस्तुमा जेष्ठ नागरिक, अपाङ्ग, एकल महिला सहित विपन्नलाई कम्मल वितरण गरिएको छ । जिल्लाको शिवराज नगरपालिका वडा नम्बर–३, मा रहेको चेतनशील सामुदायिक वन उपभोक्ता समूहले मैनार, बुलकियाका जेष्ठ नागरिक, अपांग, एकल महिला लगायत विपन्नलाई वितरण गरेको हो ।

वडा नम्बर ३ का वडाअध्यक्ष टेकलाल सापकोटाले मंगलबार कार्यक्रमलाई सम्बोधन गर्दै आफूलाई जन्माएको आमा बुवाप्रति सदैव सम्मान गर्नुपर्ने बताए । उनले शिक्षालाई प्राथमिकता दिँदै विशेषगरी थारु समुदायले ध्यान दिन आवश्यक रहेको समेत उनले जनाए । शिक्षाले नै समुदायको मुहार फेर्न जनाउँदै बालबालिकालाई पनि आफूभन्दा ठूलाको सम्मान गर्नुपर्छ भन्ने पाठ सिक्ने सापकोटाले बताए ।

वृद्धावृद्ध भएपनि अपहेलना गर्ने प्रवृत्तिले समाजमा नकारात्मक सन्देश फैलाएको बताए । सामाजिक उत्तरदायित्व अन्तर्गत वनले गरेको कार्यको प्रशंसा उनले गरे । वनलाई संरक्षण गर्न आग्रह गर्दै सामुदायिक वन समुदायको विकासमा टेवा पुग्ने उनको भनाइ छ । हराभरा वनले वातवरणसँगै जिवजन्तुलाई पनि प्रतिफल दिएको जनाउँदै वन संरक्षणप्रति आमनागरिक जागरुक भई प्रभावकारी तबरले विकासमा जोडदिनुपर्ने उनले बताए । वनले उत्पादनमूलक कार्यमा लगानी गर्न आग्रह गरे ।

यस्तै डिभिजन वन अधिकृत वरिष्ठ वन अधिकृत सूर्या मैनालीले वन सबैको साझा सम्पत्ति रहेको बताए । साझा सहकार्यबाट मात्र विकास सम्भव रहेको जनाउँदै कम्मलले आमनागरिकलाई चिसोबाट जोगाउन अवश्य पनि महत्वपूर्ण भूमिका खेल्ने समेत उनले जानकारी दिए । यसैबीच वरिष्ठ वन अधिकृत पहलवान सेरमुन्जा मगर समाज परिवर्तनमा यस कार्यले उल्लेखनीय कार्य रहेको बताए ।

सामुदायिक वन उपभोक्ता समूहका अध्यक्ष राम पाल थारुले आफू अध्यक्ष भएपछि पहिलो कार्यक्रम गरेको बताए । उनले आगामी दिनमा समाजमा यस्ता प्रभावकारी रहेको विश्वास व्यक्त गरे । स्थानीय ८२ बर्षका भोजु थारुले वनले वितरण गरेको कम्मले आफूहरुलाई न्यानो महसुुश भएको बताए । यस्ता खालका कार्यक्रम वनले पहिलो पटक गर्दा अत्यन्तै सकारात्मक रहेको उनले बताए ।