खोज

बुटवल, ७ पुस ।

लुम्बिनी प्रदेशका मुख्यमन्त्री चेतनारायण आचार्यले बुटवलको कालिका मानवज्ञान माध्यमिक विद्यालयले हासिल गरेका शैक्षिक उपलब्धि प्रदेशका अन्य विद्यालयहरुका लागि बलियो सिकाईको श्रोत हुने बताएका छन् ।

बुटवल उपमहानगरपालिका १० मा रहेको कालिका मानवज्ञान माध्यमिक विद्यालयको ६४ औं बार्षिकोत्सव एवम् अभिभावक दिवसको आइतबार उदघाटन गर्दै मुख्यमन्त्री आचार्यले विद्यालयले सबै क्षेत्रमा उत्कृष्ठता हासिल गरेको छ भन्दै यसबाट अन्य विद्यालयहरुले सिक्न जरुरी छ भने ।

उनले कालिका मानवज्ञान विद्यालयले गर्ने हरेक क्रियाकलाप र भावी योजनामा प्रदेश सरकारको साथ सहयोग रहने विश्वास दिलाउँदै विद्यालयले हासिल गरेका उपलब्धीले सिंगो लुम्बिनी प्रदेशको गौरव बढाएको उल्लेख गरे ।

विद्यालयलाई यस उचाईमा ल्याई पु¥याउन भूमिका खेल्ने सबै बधाईको पात्र रहेको चर्चा गर्दै मुख्यमन्त्री आचार्यले विद्यालयले यो उचाई सधैं कायम राख्न निरन्तर भूमिका बढाइरहनुपर्ने बताए ।

‘अथक प्रयत्न र पौरखले यो विद्यालयले उत्कृष्ठताको उचाई हाँसिल गरेको छ । यस प्रकारको उचाईले प्रदेशको गौरव बढाएको छ’ मुख्यमन्त्री आचार्यले भने– प्रदेश सरकारले तपाईहरुलाई सम्मान गर्न चाहन्छ ।

बहुआयामीक क्षेत्रमा विद्यालयले हाँसिल गरेका उपलब्धिहरु शैक्षिक विकासकोलागि बलियो स्रोत बन्नेमा मुख्यमन्त्री आचार्यले विश्वास व्यक्त गरे ।
उनले नतिजाको हिसावले या अतिरिक्त क्रियाकलापको हिसावमा पनि कालिका मानवज्ञान विद्यालय देशमै नमूना रहेको उल्लेख गर्दै यहाँबाट उत्पादन भएका विद्यार्थीले जस्तोसुकै प्रतिस्पर्धामा पनि सफलता प्राप्त गरेको बताए ।

कार्यक्रममा बोल्दै बुटवल उपमहानरपालिका प्रमुख खेलराज पाण्डेयले सरकारले विद्यार्थीको संख्याको आधरमा विद्यालयका शिक्षक दरबन्दी कायम गर्नुपर्ने बताएका थिए । ५०००÷२०००÷१००० विद्यार्थी हुने विद्यालय लाई निश्चित मापदण्ड बनाउन आवश्यक रहेको भन्दै उनले नेपाल सरकार संग विद्यार्थी संख्याको आधारमा शिक्षक दरबन्द मिलान गर्नको लागि आग्रह समेत गरे । उनले अवको शिक्षा संस्कार सहितको शिक्षा आवश्यक रहेको भन्दै जहाँ संस्कार छ त्यहा शिक्षा राम्रो हुने गरेको समेत बताएका थिए । कालिका मानवज्ञान माविले सिंगो बुटवलको नाम नेपालभर कायम गर्न सफल भएको भन्दै उनले विद्यालयको भौतिक पुर्वाधार लगायतको व्यवस्थापनको लागि स्थानीय पालिकाबाट कुनै पनि कसर बाँकी नराख्ने प्रतिवद्धता समेत व्याक्त गरे ।
कार्यक्रममा बुटवल कालिका क्याम्पसका क्याम्पस प्रमुख तथा कालिका मानवज्ञान माविका पुर्व प्रधानाध्यापक घनश्याम पाठकले भनाई राख्दै अहिलेको कालिका आधुनिक कालिका बन्नको लागि धेरै जनाको योगदान उच्च रहेको बताएका थिए ।उनले राम्रो काम गर्न खोज्नेहरुको लागि जहाँ पनि समस्या सृजना हुने भन्दै समस्या संग जुधेर अगाडी बढ्न आवश्यक रहेको बताएका थिए ।

विद्यालयका पुर्व अध्यक्ष तथा बुटवल कालिका क्याम्पसका अध्यक्ष होम गलामीले बांगेकुसुम विद्यालय देखि कालिका मानवज्ञान मावि सम्म आउँदा विद्यालयको प्रगति हजारौं गुणा बढेको भन्दै यसका सबैको उच्च योगदान रहेको बताएका थिए ।

कार्यक्रममा राष्ट्रिय परिक्षा बोर्ड व्यवस्थापन कार्यालय लुम्बिनी प्रदेशका प्रमुख रमाकान्त तिवारी, बुटवल उपमहानरपालिका वडा नम्बर १० का अध्यक्ष बलु पुन, शिक्षा विकास तथा संमन्वय एकाई रुपन्देहीका प्रमुख माधव बन्जाडे, कान्ति माविका प्रधानाध्यापक गोविन्द ज्ञवाली सहित शिक्षक अभिभावक संघका अध्यक्ष केशवराज न्यौपाने, अभिभावक संघ केन्द्रीय सदस्य तथा जिल्ला अध्यक्ष लोकनाथ ज्ञवाली लगायतले आ आफ्नो भनाई राखेका थिए ।

वि.सं. २०१७ सालमा स्थाना भएको विद्यालय देशकै नमुना विद्यालयको रुपमा स्थापित छ । विद्यालयले बार्षिकोत्सव तथा अभिभावक दिवस विभिन्न रचनात्मक कार्यक्रम गरेर मनाएको हो ।

मुल समारोह विद्यालय व्यवस्थापन समितिका अध्यक्ष नित्यानन्द ज्ञवालीको अध्यक्षता तथा मुख्यमन्त्री चेतनारायण आचार्यको प्रमुख आतिथ्यतामा भएको थियो । सो अवसरमा मुख्यमन्त्री आचार्यले विद्यालयको मुखपत्र २०८१ को विमोचन गरेका थिए । विद्यालयका प्रधानाध्यापक दिनेश थापाले बार्षिक प्रगती विवरण प्रस्तुत गर्नु भएको कार्यक्रमको सहजीकरण सुदर्शन रेग्मीले गरेका थिए ।

त्यस अवसरमा विभिन्न विधामा उत्कृष्ठ ३४ जना शिक्षकलाई ‘कालिका पदक’बाट सम्मान समेत गरिएको छ । कालिका बर्ष शिक्षकको रुपमा विद्यालयका सहायक प्रधानाध्यापक पिताम्बर बन्जाडेलाई सम्मान गरिएको छ । साथै विद्यालयका विभिन्न तहका ईन्चार्ज तथा उत्कृष्ठ नतिजा प्रदान गर्ने अन्य ३४ जना शिक्षकलाई ‘कालिका पदक बाट सम्मानित गरिएको हो ।