बुटवल, ७ पुस ।
लुम्बिनी प्रदेशका मुख्यमन्त्री चेतनारायण आचार्यले बुटवल उपमहानगरपालिका-१० स्थित कालिका मानवज्ञान माध्यमिक विद्यालयको ६४ औं बार्षिकोत्सव र अभिभावक दिवसको उद्घाटन गर्दै विद्यालयको शैक्षिक उपलब्धिहरूको प्रशंसा गरेका छन्। उनले विद्यालयका विद्यार्थी, शिक्षक र अभिभावकको कडा मेहनत र समर्पणको कारण विद्यालयले शैक्षिक र अन्य क्षेत्रमा उत्कृष्टता हासिल गरेको बताएका छन्।
मुख्यमन्त्री आचार्यले सो अवसरमा विद्यालयलाई प्रदेशका अन्य विद्यालयहरूको लागि एक आदर्श केन्द्रको रूपमा प्रस्तुत गर्नुपर्ने विचार व्यक्त गरे। “यस विद्यालयले शैक्षिक क्षेत्रदेखि अतिरिक्त क्रियाकलापसम्म सबै क्षेत्रमा उत्कृष्ठता हासिल गरेको छ, र यसबाट अन्य विद्यालयहरूले प्रेरणा लिनुपर्छ,” उनले भने। उनले विद्यालयको प्रगति र शैक्षिक स्तरको उदाहरणको रूपमा कालिका विद्यालयलाई लुम्बिनी प्रदेशको गौरवको रूपमा चित्रित गरे।
मुख्यमन्त्री आचार्यले विद्यालयको विकास र सफलता को समर्थन गर्नका लागि प्रदेश सरकारको पूर्ण सहकार्य रहने आश्वासन पनि दिएका थिए। “यो विद्यालयले हासिल गरेको सफलता र उच्च शैक्षिक स्तरले सिंगो प्रदेशको गौरव बढाएको छ। यस प्रकारको उत्कृष्टता अन्य विद्यालयहरूले पनि अनुकरण गर्नुपर्ने छ,” उनले भने। उनले विद्यालयका शिक्षिका, विद्यार्थी र अभिभावकको श्रमको मूल्याङ्कन गर्दै, यसको निरन्तर प्रयास र पौरखले विद्यालयलाई यो उचाइमा पुर्याएको कुरा उल्लेख गरे।
सो अवसरमा विद्यालयले रचनात्मक कार्यक्रमहरूको आयोजना गरेको थियो। विद्यालय व्यवस्थापन समितिका अध्यक्ष नित्यानन्द ज्ञवालीको अध्यक्षतामा सम्पन्न कार्यक्रममा मुख्यमन्त्री आचार्यले विद्यालयको मुखपत्र २०८१ को विमोचन गर्नुभएको थियो। प्रधानाध्यापक दिनेश थापाले विद्यालयको वार्षिक प्रगति विवरण प्रस्तुत गर्नुभएको थियो। यस कार्यक्रमको सहजीकरण सुदर्शन रेग्मीले गरेका थिए।
बातावरणका हिसाबले पनि विद्यालयले शैक्षिक, सांस्कृतिक र सामाजिक गतिविधिहरूमा सक्रिय भाग लिइरहेको छ र यहाँका विद्यार्थीहरूले प्रतिस्पर्धात्मक परीक्षाहरू र अन्य क्षेत्रमा सफलता हासिल गरेका छन्। यस विद्यालयको शैक्षिक उपलब्धिहरूले यसलाई केवल बुटवल वा लुम्बिनी प्रदेशमै नभएर देशभर आदर्शका रूपमा प्रस्तुत गरेको छ।
