खोज

सल्यान, ६ पुस ।
करदाता सेवा कार्यालय सल्यानले पाँच महिनाको अवधिमा साढे ११ करोड बढी राजस्व संकलन गरेको छ । २१ करोड ९९ लाख ७२ हजार ५८० रूपैयाँ राजस्व उठाउने लक्ष्य भएता पनि चालु आर्थिक वर्ष २०८१/०८२ को श्रावणदेखि मंसिरसम्म ११ करोड ६५ लाख ६२ हजार ४७० रूपैयाँ मात्र संकलन भएको कार्यालयले जनाएको छ ।
राजस्व संकलनको लक्ष्य नै बढी हुने एवम् राजस्व संकलनको मुख्य लक्ष्य आयकर र मूल्य अभिबृद्धि कर भएकाले सरकारी रकम सरकारी निकायहरूमा आएर खर्च नहुँदा सम्म अपेक्षित रूपमा राजस्व संकलन हुन नसकेको करदाता सेवा कार्यालय सल्यानका सूचना अधिकारी खुमराज शर्माले जानकारी दिए । ‘उद्योग, कलकारखाना धेरै नभएका कारण र विभिन्न सरकारी योजना तथा कार्यक्रमहरू सम्पन्न भइनसकेको कारण लक्ष्य अनुसार राजस्व संकलन हुन नसकेको हो,’ उनले भने ।
करदाता सेवा कार्यालय सल्यानले अघिल्लो आर्थिक वर्ष २०८०/०८१ मा ४७ करोड ६९ लाख ९९ हजार ९४० रूपैयाँ राजस्व संकलन गरेको थियो । ६२ करोड ७९ लाख १५ हजार रूपैयाँ राजस्व संकलन गर्ने लक्ष्य लिइएकोमा लक्ष्यभन्दा कम ७६ प्रतिशत मात्रै राजस्व संकलन गरिएको कार्यालयले जनाएको छ । यस्तै आर्थिक वर्ष २०७९/०८० मा भने ४१ करोड ६१ लाख १६ हजार ३४० रूपैयाँ लक्ष्य रहेकोमा ५० करोड ९२ लाख ४८ हजार ९९० रूपैयाँ राजस्व संकलन भएको थियो ।
करदाता सेवा कार्यालयले कर शिक्षा, बजार अनुगमन जस्ता कार्यहरू गरिरहेको जनाएको छ । ऐनमा भएको करसम्बन्धीको व्यवस्था, करको दायरा, समयमै कर तिर्नुपर्ने, सबैले कर तिर्नुपर्ने, कर छलि गर्न नहुने लगायतका विषयमा कार्यालयले शिक्षा दिदै आएको छ । डिजिटल प्रणालीको विकासले कर बुझाउने प्रक्रियामा सुधार ल्याएको सूचना अधिकारी शर्माको भनाई छ ।
करदाताले अनलाइन प्रणाली मार्फत सजिलै कर बुझाउनसक्ने उनले जनाए । स्थानीय तहमा दर्ता भएका करदाताहरूलाई अनिवार्य स्थायी लेखा नम्बर लिनका लागि स्थानीय तहलाई आग्रह गर्ने गरिएको कार्यालयले जनाएको छ ।
आन्तरिक राजस्व कार्यालय तुलसीपुर दाङको मातहतमा रहनेगरी सल्यान, रुकुम पश्चिम र रुकुम पूर्वका करदाताहरूलाई सेवा प्रवाह गर्ने गरी २०७७ मा करदाता सेवा कार्यालयको स्थापना भएको थियो । कार्यालयले आफ्नो कार्यक्षेत्रभित्र आयकर, मूल्य अभिवृद्धि कर र अन्तःशुल्कसम्बन्धी नीतिहरूको कार्यान्वयन र सेवा प्रवाह गर्दै आएको छ ।
व्यक्तिगत तथा व्यावसायिक स्थायी लेखा नम्बर र भ्याट दर्ता तथा खारेज, करचुक्ता प्रमाणपत्र प्रदान, कर विवरण, आय विवरण, अन्तः शुल्क विवरण बुझाउने लगायतका सेवा लिन तीन जिल्लाका सेवाग्राहीलाई दाङ जानुपर्ने बाध्यताको अन्त्यका लागि सल्यान श्रीनगरमा करदाता सेवा कार्यालय स्थापना गरिएको हो । कर संकलनलाई थप प्रभावकारी बनाउन कार्यालयले बजार अनुगमन, बक्यौता रकम संकलन, र ऐन नीयम उल्लंघन गर्नेलाई जरिवाना तथा कानूनी कारबाहीका लागि सिफारिस जस्ता कार्यहरू गर्दै आएको जनाएको छ ।