खोज

लमही, ४ पुस ।
राजपुर गाउँपालिकाका जनप्रतिनिधिहरूसहितको टोलीले मङ्गलबार दिनभर वडा नम्बर ४ अन्तर्गतका रोहिनियाँ, दुलैया र खाल्सा गाउँमा किसानहरूको खेतबारी र गोठमा स्थलगत अनुगमन गरेको छ ।
यो अनुगमन समुदायमा आधारित कार्यसञ्जाल संस्था “दक्षिण देउखुरी अधिकार मञ्च“ को आव्हानमा गरिएको हो। यस क्रममा गाउँपालिकाका अध्यक्ष, उपाध्यक्ष, कृषि, पशु, महिला तथा बालबालिका, सूचना प्रविधि शाखाका प्रमुखहरू र वडा अध्यक्षहरू सहभागी भएका थिए । टोलीले किसानहरूले गरिरहेको तरकारी खेती, बंगुर, बाख्रापालन, ब्रोइलर व्यवसायलगायत गतिविधिको अध्ययन गर्न किसानहरूको घर–घरमा पुग्यो ।
“गाउँपालिकाका जनप्रतिनिधिहरू भोट माग्नमात्र आउँछन् भन्ने सोच्थ्यौं । तर, यसरी अध्यक्ष, उपाध्यक्ष र वडा अध्यक्षहरू आफ्नै आँगनमा आएर हाम्रो खेतीपाती हेर्नु खुसीको कुरा हो,” खाल्सा गाउँकी बाख्रा पालक किसान चित्रकला पुनले भनिन् ।
बंगुर पालन गर्दै आएकी रोहिनियाँकी पुष्पा चौधरीले दक्षिण देउखुरी अधिकार मञ्चको खोर सुधार अनुदानले व्यवसाय गर्न सजिलो भएको बताइन् । उनले भनिन्, “बंगुर बेचेर घरखर्च चलाउन सफल भएकी छु । संस्थाले दिएको सानो सहयोगले जिविकोपार्जन गर्न थप प्रेरणा मिलेको छ ।”
दक्षिण देउखुरी अधिकार मञ्चले रोहिनियाँ, दुलैया र खाल्सा गाउँका २३ परिवारलाई जनही ५ हजार रूपैयाँका दरले खोर सुधारका लागि सहयोग गरेको छ । अध्यक्ष देवराज कुँवरका अनुसार, संस्थाले राजपुर र गढवा गाउँपालिकाका १५ वटै वडाका बिपन्न तथा सिमान्तकृत समुदायलाई लक्षित गरी आयआर्जन र जिविकोपार्जन सुधार कार्यक्रम सञ्चालन गरिरहेको छ ।
संस्थाले समुदायका सदस्यहरूलाई बाख्रा पैंचो कार्यक्रम, घुम्ती कोष वितरण, सुधारिएको धुवाँरहित चुल्हो निर्माण, छात्रवृत्ति, पशुपालन, तरकारी खेती, किराना पसल सञ्चालनजस्ता गतिविधिमा अनुदान प्रदान गरिरहेको छ । मङ्गलबार आयोजित कार्यक्रममा २३ जना बाख्रा र बंगुर पालक किसानहरूलाई जनही ५ हजारका दरले कुल १ लाख १५ हजार रूपैयाँ वितरण गरिएको छ । कार्यक्रममा राजपुर गाउँपालिकाका अध्यक्ष शरदकुमार बुढाथोकीले दक्षिण देउखुरी अधिकार मञ्चले गरेको उदाहरणीय कामले पालिकालाई टेवा पु¥याएको बताए ।
गाउँपालिकाकी उपाध्यक्ष धनपति यादवले संस्थाका सकारात्मक गतिविधिहरूमा पालिकाको निरन्तर सहयोग रहने बताइन्। प्रमुख प्रशासकीय अधिकृत रेमन्तबहादुर डाँगी, पशुपक्षी शाखाका प्रमुख डा. दीपक नेपाली, कृषि शाखा प्रमुख रिता भण्डारी, महिला तथा बालबालिका शाखाकी प्रमुख सुनिता चौधरीलगायतले पनि कार्यक्रमलाई सम्बोधन गरे।