खोज

बुटवल, ४ पुस । औद्योगिक व्यापार मेला बुटवल २०८१ मा साँस्कृतिक कार्यक्रम अन्तरगत ‘भ्वाइस अफ बुटवल’ को अडिसन राउण्ड सम्पन्न भएको छ । बुटवल उद्योग वाणिज्य संघ रुपन्देहीको आयोजना तथा बुटवल उपमहानगरपालिका र नेपाल उद्योग वाणिज्य महासंघको संरक्षकत्वमा बुधबारदेखि औपचारिक रुपमा सुरु भएको मेलाको मुख्य आर्कषणको रुपमा भ्वाईस अफ बुटवललाई लिईन्छ । अडिसन राउण्डमा १६ जना प्रतियोगीहरु सहभागी भएको साँस्कृतिक उपसमितिका संयोजक निर्मित कसजूले बताए । प्रतियोगिताको विजेताले नगद ५५ हजार ५५५ पुरस्कार राशीसहित विभिन्न आकर्षक गिफ्ट ह्यम्पसर तथा फष्ट रनरअपले ३० हजार ३३३ रुपैयाँ नगद राशीसहित विभिन्न गिफ्टह्याम्पर प्राप्त गर्ने उनले बताए ।

भ्वाइस अफ बुटवलमा गायक बसन्त श्रेष्ठ तथा नारायण थापा निर्णायक रहेका छन । प्रतियोगितामा प्रतियोगीको प्रस्तुतीलाई निर्णायकले प्रदान गर्ने अंकसंगै दर्शकको मतलाई विजेता छनोटको आधार रहने उनले बताए ।

यसैगरि महोत्सवमा विहिबार सिन्धुली कलाघरको विशेष प्रस्तुती रहने साँस्कृतिक उपसमितिका सह संयोजक सुमन श्रेष्ठले बताएका छन । सिन्धुली कलाघरका कलाकारहरुले बन्चे बाजा लगायतका साँस्कृतिक नृत्यसहितका प्रस्तुतीहरु रहने उनले बताए । यसैगरी लोक तथा दोहोरी गायक शिव हमाल, गायक रामप्रसाद पाण्डे, गायिका सकुन्तला पाण्डे र कोपिला न्यौपानेको प्रस्तुती रहने छ ।
यसैगरी युवाहरुलाई लक्षित स्थानिय ब्याड ‘द क्लाउन्स ब्याण्ड’ को प्रस्तुतीसमेत रहेको उनले बताए । मेला अवधिभर लोक दोहोरी प्रतियोगिता, भ्वाईस अफ बुटवल, विद्यालय स्तरीय लोक दोहोरी प्रतियोगिता, माध्यमिक विद्यालय स्तरीय लोकनृत्य प्रतियोगिता, भजन चुट्का प्रतियोगिता, हास्यव्यङ्ग्य प्रतियोगिता, व्युटी फेयर, टिकटक लगायतका प्रतियोगिता गरिने श्रेष्ठले बताए । १६ दिनसम्म सञ्चालन गरिने मेलामा ५ लाख बढीले अवलोकन गर्ने र मेला भित्र १५ करोड बढीको कारोवार हुने अनुमान गरिएको बुटवल उद्योग वाणिज्य संघका अध्यक्ष हरिप्रसाद अर्यालले बताए ।
औद्योगिक उत्पादनको प्रवर्द्धन, कृषि, पर्यटनको प्रवर्द्धन तथा व्यबसायिकरणका लागि विशेष महत्वका साथ आयोजना गरिएको औद्योगिक व्यापार मेलामा कृषि, सेवा, हस्तकला, ईलेक्ट्रिक एण्ड ईलेक्ट्रोनिक्स, व्यूटि, गार्मेन्ट, जुत्ता, एफएमसिजी (फूड एण्ड वेभरेज), अटोमोवाईल्स र होटलको छुट्टा छुट्टै १० वटा पेभिलिन रहेकाछन् । त्यसैगरी दुबई फिस टनेल सहितको बालउद्यान रहेको छ । मेलामा औद्योगिक प्रदर्शनी, हस्तकला प्रदर्शनी, कृषि प्रदर्शनी र प्रविधिको प्रदर्शनी तथा विक्रि वितरण हुने संघका महासचिव मुक्ति अधिकारीले जानकारी दिए ।

मेला अवलोकन गर्न आउने सर्वसाधारणका लागि ७० रुपैंया र विद्यार्थीका लागि ५० रुपैया टिकट शुल्क निर्धारण गरिएको छ । त्यस्तै जेष्ठ नागरिक, असहाय, अपांगता भएका व्यक्तिका लागि निःशुल्क टिकटको व्यवस्था मिलाईएको छ ।