खोज

बुटवल उद्योग बाणिज्य संघको आयोजनामा लगानी लुम्बिनीमा समृद्धि देशमा भन्ने नाराका साथ २४ औं संस्करणको औद्योगिक व्यापार मेला आजदेखि सुरु हुँदैछ । औद्योगिक व्यापार मेलाले यस क्षेत्रमा औद्योगिक जागरण सिर्जना गर्न महत्वपूर्ण सहयोग पुग्ने ठानिएको छ । त्यसका साथै बुटवल लगायत समग्र रूपन्देहीको आर्थिक गतिविधि बढाउन मेला सहयोगी हुने विश्वास गरिएको छ । मेलाले स्वदेशी उत्पादनको प्रदर्शन र बजारीकरण गर्न समेत सहयोग पुग्ने अपेक्षा आयोजकले राखेका छन. । त्यसैगरी बुटवलमा आयोजना हुने मेला तथा महोत्सवको विशिष्ट पहिचानलाई व्यापकता दिन र यस क्षेत्रमा उद्यमशीलता विकासको माध्यमबाट नयाँ औद्योगिक लगानी र व्यवसायिक क्षेत्रहरूको खोजी गरी रोजगारीका अवसरहरू सिर्जना गर्न अझ परिस्कृत रूपमा यो मेलाको आयोजना गरिएको आयोजक बुटवल उद्योग बाणिज्य संघको दावी छ । निश्चित रूपमा औद्योगिक उत्पादनको प्रवद्र्धन, कृषि र पर्यटनको प्रवद्र्धन तथा व्यबसायिकरणका लागि बिशेष महत्वका साथ आयोजना गरिएको औद्योगिक व्यापार मेलाले कृषि, सेवा र हस्तकलाको प्रवद्र्धन गर्न सहयोग पुग्ने विश्वास गरिएको छ । मेलामा औद्योगिक प्रदर्शनी, हस्तकला प्रदर्शनी, कृषि प्रदर्शनी र प्रविधिको प्रदर्शनी हुँदा यस क्षेत्रमा मेलाको पक्षमा जागरण सिर्जना हुनेछ । आयोजकले मेलालाई अहिलेसम्म भएका मेला भन्दा धेरै फरक बनाउने गरी मेलाको तयारी भएकोले मेला आर्थिक विकासमा कोसेढुंगा सावित हुने विश्वास गरिएको छ । मेलाको ५ लाख दर्शकले अवलोकन गर्ने र १० करोडको आर्थिक कारोवार हुने लक्ष्यले नै मेलाको सफलता झल्किएको छ । अर्कोतर्फ मेलामा औद्योगिक प्रविधि, नेपाली उद्योग र तिनको उत्पादन, अर्गानिक बस्तुको प्रदर्शनीले उद्योग, उत्पादन र उपभोक्तावीचको सम्वन्ध अझै नजिक ल्याउन सहयोग पुग्ने विश्वास गरिनु अन्यथा होइन । उत्पादित बस्तुहरूको बजार प्रवद्र्धन र गुणात्मक प्रतिस्पर्धाको विकास गर्ने, उद्योगीहरूका बीचमा समस्या, अवसर र चुनौतीबारे अन्तरक्रिया गर्ने, सूचना र प्रविधिको विकास, पर्यटन संभावनाको क्षेत्र पहिल्याउने, सान्दर्भिक गोष्ठी, अन्तरक्रिया र कार्यशालाको आयोजना गर्ने आयोजकको योजनाले यो मेला सफल हुने कुरामा सन्देह छैन ।

बुटवलका विभिन्न व्यावसायीक संघ संस्थाले आलोपालो गर्दै मेला, प्रदर्शन र महोत्सव गर्दै आएका छन । यसरी आयोजना हुने मेला, प्रदर्शनी र महोत्सवले निश्चित रूपमा स्थानीय गतिविधि बढाउन सहयोग पुग्छ । स्थानीय उत्पादन प्रवद्र्धन गर्न टेवा पुग्छ भने त्यसका कारण औद्योगिक एवं व्यापारिक गतिविधि बढाउन सहयोग पुग्छ । त्यसैपनि अहिले मुलुक आर्थिक रूपमा त्यति सबल छैन । सरकारलाई आर्थिक श्रोत जुटाउन र खर्च धान्न मुस्किल परिरहेको छ । बुटवलमै व्यवसायको अवस्था नाजुक छ । यो विद्यमान परिस्थितिको अन्त्यका लागि बुटवल मेला कोसेढुंगा सावित हुने अपेक्षा गरिएको छ । मुलुकमा आर्थिक संकटको यो घडीमा समेत मेला आयोजना हुनु राम्रो संकेत हो । भैरहवा र मणिग्राममा भर्खरै महोत्सव र मेला सम्पन्न भएको छ । त्यो महोत्सवले त्यस क्षेत्रको चहलपहलमा बृद्धिमात्र भएको छैन, स्थानीय गतिविधि बृद्धि गरि राष्ट्रिय उत्पादनमा सहयोग पुगेको छ भन्ने ठान्न सकिन्छ । वास्तवमा देश संकटमा हुँदा पनि आर्थिक गतिविधि बढ्ने अवस्थाले आशाको संचार गरेको छ । पछिल्लोसमय रूपन्देहीमा भैरहेका मेला र महोत्सवले यस क्षेत्रको उद्योग र व्यापारको क्षेत्र प्रवद्र्धनमा ठूलो टेवा पुगेको छ । भैरहवामा सम्पन्न लुम्विनी महोत्सवले नेपालका उद्योगले उत्पादन गरेका उत्पादन उपभोक्ताले चिन्न र किन्ने मौका पनि पाएका छन । नेपालकै उत्पादनको विषयमा उपभोक्तालाई जानकारी नभएको अवस्थामा महोत्सवले त्यो अवसर जुराएको छ । त्यसैगरी मणिग्राममा सम्पन्न मेलाले पनि यस क्षेत्रको औद्योगिक जागरणमा महत्वपूर्ण सहयोग पुगेको हो । मेला र महोत्सवका गतिविधिले केही आशाातीत संभावनालाई उजागर गरिरहेका छन् । मेला र महोत्सवको चहलपहलले देशलाई आर्थिक सम्मृद्धितर्फ उन्मुख गराउन ठूलो मद्दत गर्दछ । यस प्रकारका मेला महोत्सवलाई आगामी दिनमा पनि प्रवद्र्धन गर्नु आवश्यक छ ।