खोज

बुटवल ।

कान्ति माध्यमिक विद्यालय बुटवलको ७१ औं वार्षिक उत्सव तथा अभिभावक दिवस सम्पन्न भएको छ । कान्ति माविका संरक्षक एवं बुटवल उपमहानगरपालिका वडा नम्बर ४ का वडाअध्यक्ष नरिश्वर शर्माको अध्यक्षतामा सम्पन्न कार्यक्रमको उदघाटन बुटवल उपमहानगरपालिका नगरप्रमुख खेलराज पाण्डेले गरेका थिए ।

कार्यक्रममा बोल्दै नगरप्रमुख पाण्डेले बुटवल मुलुकको शैक्षिक केन्द्र भएकोले यहाँका हरेक शैक्षिक संस्थाहरुले कान्ति माविको सफलताबाट प्रेरणा लिएर आफ्ना शैक्षिक योजना बनाउन सुझाव दिए । बुटवल उपमहानगरपालिकाका उपप्रमुख सावित्रादेवी अर्यालले कान्ति माविको शैक्षिक सफलताले बुटवलको सफलतामा महत्वपूर्ण ईटा थपेकोले आगामी दिनहरुमा प्राविधिक शिक्षा अगाडि बढाउनका लागि नगरपालिकाले सबै प्रकारका सहयोग गर्ने प्रतिबद्धता जनाए ।

शिक्षा विकास तथा समन्वय इकाई रूपन्देहीका प्रमुख माधव बन्जाडेले कान्ति माविको शैक्षिक गुणस्तर सुधारको प्रयास र शिक्षक कर्मचारीको लगाव र प्रतिबद्धतामा रूपन्देही मात्र नभएर देशकै विद्यालय शिक्षा शिक्षाको लागि गौरवको विषय भएको र यसलाई कायम राखी राख्ने चुनौतीको सामना गर्ने क्षमता कान्ति माविको टिममा रहेको बताए ।

भुतपुर्व विद्यार्थीको संस्थाका अध्यक्ष गोपाल अधिकारीले विद्यालयको शैक्षिक, भौतिक र प्राविधिक सफलताका लागि अल्मुनाई एशोसिएशनले हरेक प्रकारका सहयोग र सहकार्य गर्ने बताए ।

कार्यक्रममा विभिन्न संघसंस्थाहरू, उत्कृष्ट अभिभावक, उत्कृष्ट शिक्षकहरुमा मोहन भट्टराई, केशवराज भण्डारी, खुमराज पौडेल, चन्द्रकला न्यौपाने, कर्मचारी निर्मला देवकोटा र केशव श्रेष्ठ एवम् शिक्षा पत्रकारितामा योगदान पुरÞ्याए बापत पत्रकार विकास पराजुलीलाई सम्मान गरिएको थियो ।

कार्यक्रममा अक्षयकोषदाता, उत्कृष्ट नतिजा प्राप्त गर्ने कक्षा १२, एसईई र कक्षा ८ उत्तीर्ण विद्यार्थीहरु र एमबीबीएस, हन्जिनियरिङ, वन, फार्मेसी, बीडीएस, एएससी नर्सिङ, बीबिीए लगायतमा पूर्ण छात्रवृत्तिमा नाम निकाल्न सफल विद्यार्थीहरुलाई सम्मान गरिएको थियो भने नर्सरी देखि कक्षा १२ सम्म अध्यापन गर्ने १०२ जना शिक्षक तथा कर्मचारीहरूलाई नतिजाको आधारमा सम्मान गरिएको थियो । वर्ष शिक्षक ÷ कर्मचारीको रुपमा शिक्षक तथा कर्मचारीहरुलाई समेत सम्मान गरिएको थियो। विज्ञान प्रदर्शनी, पुस्तक प्रदर्शनी लगायतका कार्यक्रमहरू समेत समावेश गरिएको समारोहमा नगरस्तरीय लोक भजन प्रतियोगिता समेत सम्पन्न भएको थियो।

कार्यक्रममा विद्यालयमा कार्यरत शिक्षक, कर्मचारी तथा विद्यार्थी एवम् विज्ञहरुका लेख रचनाहरु समावेश गरी हरेक वर्ष प्रकाशन गरिने कान्ति दर्पणको विमोचन गरिएको थियो ।

कार्यक्रममा विद्यालयका प्रधानाध्यापक गोविन्द ज्ञवालीले विद्यालयको प्रगति प्रतिवेदन पेश गरेका थिए । त्यस अवसरमा आइएसओ नेपालका कन्ट्री डाइरेक्टर सुदिप शर्माले विद्यालयलाई आइएसओ प्रमाणपत्र समेत प्रदान गरेका थिए् । अब कान्ति माध्यमिक विद्यालय नेपालमा आइएसओ प्राप्त पहिलो सामुदायिक विद्यालय भएको छ । कार्यक्रममा विद्यार्थीले सचेतनामूलक नाटक र विविध सांस्कृतिक कार्यक्रम समेत प्रस्तुत गरेका थिए । कार्यक्रम विद्यालयका खेल प्रशिक्षक महेश खनालले पनि आफ्नो धारणा राखेका थिए ।