खोज

बुटवल, २ पुस ।

गृहमन्त्री रमेश लेखकले लोकतन्त्रमा भीडको शासन स्वीकार्य नहुने बताएका छन् । “लोकतन्त्र भनेको विधिको शासन हो, अनुशासन हो, तर यसका नाममा भीडतन्त्र र अराजकता स्वीकार्य हुन सक्दैन”–उनले भने ।

भैरहवामा मंगलबार आयोजित लुम्बिनी प्रदेशस्तरीय सुरक्षा गोष्ठीलाई संबोधन गर्दै गृहमन्त्री लेखकले यस्तो बताएका हुन् । सहकारी रकम अपचलनमा पक्राउ परेका रास्वपा सभापति रवि लामिछानेविरुद्ध कानुन बमोजि अनुसन्धान भैरहेको र कानुनलाई चुनौती दिने गरी अदालत वा प्रहरी प्रशासनअगाडि भीड जम्मा पारेर विधिको शासनलाई चुनौती दिने काम भएको भन्दै उनले यो स्वीकार्य नहुने बताए ।

“लोकतन्त्रको सुन्दर पक्ष नै विधिको शासन हो, कानुन अनुसार अनुसन्धान भैरहेको विषयमा भीड जम्मा पारेर विधि विरुद्ध बल मिच्याईं गर्नु मुर्खता हो”–उनले भने । उनले समाजमा द्वन्द्व र अराजकता निम्ताउने गरी व्यक्तिको चरित्र हत्या र दुष्प्रचार भएको भन्दै गृहमन्त्रीले कानुनी शासनमा भीडले प्रभावित गर्ने प्रयास भएको बताए । उनले साइबर अपराध नियन्त्रण गर्न पनि सुरक्षा प्रमुखहरुलाई निर्देशन दिए

सुरक्षा गोष्ठीमा सहभागी बाह्रै जिल्लाका सुरक्षा निकायलाई निर्देशन दिंदै गृहमन्त्री लेखकले राजस्व असुली, तस्करी र सीमापार अपराध नियन्त्रणका आधारमा सरकारले मूल्यांकन गर्ने बताए । “लुम्बिनी प्रदेशमा राजस्व चुहावट, तस्करी र सीमापार अपराधको समस्या र चुनौती छ, यसको नियन्त्रणका आधारमा सरकारले सुरक्षा निकायको मूल्यांकन गर्छ”–उनले भने ।

गृहमन्त्री लेखकले अहिलेको गठबन्धन सरकार मुलुकमा दिगो शान्ति र सुशासन कायम गर्न बनेको दाबी गर्दै यो समीकरण २०८४ को चुनावसम्म कायम रहने बताए ।

‘२०८४ को चुनावसम्म यही गठबन्धन रहन्छ कुनै तल–माथि हुन्न’ गृहमन्त्री लेखकले भने । अहिलेको संविधानले नागरिकलाई अधिकार सम्पन्न बनाएकाले संविधानको रक्षा महत्वपूर्ण भएको उनको भनाइ छ । संविधानको रक्षा र कार्यान्वयनका लागि शान्ति सुरक्षाको सुनिश्चित हुनुपर्ने गृहमन्त्री लेखकले बताए ।

गृहमन्त्री लेखकले लुम्बिनीमा लागूऔषध, वित्तीय अपराध, आत्महत्या, सवारी दुर्घटना, साइबर क्राइम जस्ता अपराध रहेको औँल्याए ।

लुम्विनी प्रदेश बुद्ध जन्मस्थलका कारण विश्वभरका धार्मिक पर्यटक आउने थलो र विश्व शान्तीको मुहान भएकाले यहाँको सुरक्षा व्यवस्था चुस्त र भरपर्दो हुनुपर्ने गृहमन्त्रीले बताए ।

यसअघि सातवटै प्रदेशका आन्तरिक मामिला मन्त्रीहरुसँग छलफल गरेर राय सुझाव लिएको बताए ।

कार्यक्रममा लुम्बिनी प्रदेशका मुख्यमन्त्री चेतनारायण आचार्यले संघीयताको मर्मलाई बुझेर अघि बढ्नुपर्ने आवश्यकतामा जोड दिंदै प्रहरी समायोजनको काम नहुँदा प्रदेशको शान्ति सुरक्षालाई व्यवस्थित गर्न नसकिएको बताए । उनले प्रहरी समायोजनसँगै प्रदेश अनुसन्धान विभाग समेत गठन गरेर अघि बढाउन संघीय सरकारको ध्यानाकर्षण गराए ।