खोज

बर्दिया, २ पुस ।
जब्दीघाटमा भत्किएको पुल निर्माण नहुँदा स्थानीयले सास्ती भोगिरहेका छन् । गुलरिया र बारबर्दिया नगरपालिका जोड्ने जब्दी पुल निर्माण हुन नसक्दा स्थानीयले सास्ती भोग्नु परेको हो । २०७९ असोज २२ गते आएको बाढीले पुलको तीन वटा स्पान बगाएको थियो । बादीले बगाएको सो स्पान हालसम्म निर्माण हुन सकेको छैन । जसका कारण स्थानीयवासीहरू जोखिम पूर्ण यात्रा गर्न बाध्य छन् । स्थानीयले आवतजावत गर्न डुङ्गाको प्रयोग गर्नु परेको छ ।

बारबर्दिया नगरपालिका –११ की माया थारूले पुल नहुँदा गुलरिया अस्पताल जान, र अन्य सरकारी कार्यालयमा जाँदा निकै समस्या भोग्नु परेको बताईन । बनेको पुल भत्किए पछि ५ मिनेट बाटो पनि आधा घण्टा लाग्ने गरेको छ । बिरामी हुँदा वा अन्य काममा जाँदा धेरै समय खर्च हुन्छ । नदीमा आवतजात गर्न समेत पनि पैसा तिनुपर्छ उनले बताईन ।

त्यसैगरी बारबर्दिया–१० की खुशी राम थारूले बिरामी भएर अस्पताल जानु परेमा नदी तरेर जानुपर्छ । रातमा कोही बिरामी हुँदा झनै समस्या हुन्छ रातमा डुङ्गा चढेर आउन जान जोखिम हुन्छ  भने डुङ्गा चढेर हिँड्न समेत झन समस्याको बताए । बारबर्दिया –४ रामपुरका बाशुदेव ज्ञवालीले डुङ्गा राखेर यात्रा गर्दा निकै जोखिम हुने गरेको बताए । उनले भने, ‘घरआँउदा जाँदा साथमा मोटरसाइकल दुईवटा छोरा हुन्छन् । मोटरसाइकलको सुरक्षा गर्ने की छोराहरूको । मनमा सधै त्रास हुन्छ । नदी वारपार गर्न समेत जोखिम हुन्छ ।’

करिब चार सय २५ मिटर पुल हस्तान्तरण नहुँदै २०७४ साउन २९ गते पुलका दुईवटा स्पान भासिएको थियो । पुलको स्पान भासिएको भए पनि पुलबाट साना सवारीसाधनका, मोटरसाइकल, साइकल, अटो सहज रूपमा ओहरदोहर गर्दै आएका थिए । २०७९ असोज २२ गते आएको बाढीले पुलको तीन वटा स्पान बगाए पछि आवतजावत नै पूर्णरूपमा बन्द भएको हो । बाढीले पुल बगाएको पनि सात वर्ष भन्दा बढी समय हुँदा समेत निर्माण हुन नसकेको बारबर्दिया नगरपालिका ५ का वडा अध्यक्ष लालबहादुर चौधरी बताए । उनले पटक पटक मन्त्री र सांसद आएर पुल निर्माण गर्ने प्रतिबद्धता गरे पनि आजसम्म पुल निर्माण हुन नसकेको बताए ।

बाारबर्दियाका नगरपालिकाका प्रमुख छविलाल थारूले पुल निर्माणको लागि यस वर्ष एक करोड सङ्घीय सरकारले बजेट छुट्टाए जानकारी दिए । उनले पुल भत्किएपछि पुल निर्माण गर्ने कम्पनीलाई अख्तियारमा मुद्दा परेको कारण सो स्थानमा पुल बन्न नसक्ने भन्दै सरकार बारबर्दिया ११ र गुलरिया ४ जोड्न सोही नदीको आसपासमा बबई नदी पुल भनेर योजना अगाडि बढाएको भएपनि सरकारले व्यवस्थापन गरेको बजेट अपुग रहेको बताए । ‘सरकारले बबई नदीमा पुल हाल्नका निम्ति डिपीआरको काम अगाडि बढाएको छ । तर सरकारले व्यवस्थापन गरेको बजेट पुल निमार्णका काम अगाडि बढ्न सक्दैन् । पुल निर्माण गर्नका लागि थप बजेटको व्यवस्था पुल निमार्ण काम बढाउन आग्रह पनि गरे ।’
बारबर्दिया नगरपालिकाले डुङ्गा सञ्चालनको लागि २१ लाखमा ठेक्का दिएको छ । डुङ्गामा आवतजावत गर्दा मोटरसाइकलको १५, साइकलले १० बाख्राको १०, कुखुराको ३ र मानिसको १० रूपियाका दरले रकम तिर्नुपर्ने बाध्यता रहेको छ । बिरामी, विद्यार्थी, सर्वसाधरण, कर्मचारी, शिक्षक गरी दैनिक १ हजार भन्दा बढी मानिसहरू डुङ्गामा आवतज(ावत गर्छन् ।