खोज

भैरहवास्थित अन्तर्राष्ट्रिय गौतमबुद्ध विमानस्थलबाट अन्तर्राष्ट्रिय उडान सुरु भएसंगै उडानलाई लिएर अनेक आशंका जन्मिएका छन । अन्तर्राष्ट्रिय उडान धेरै दिन नटिक्ने दावी केही क्षेत्रबाट प्रकट भएको छ । यो विमानस्थल नचलोस् भन्नेहरूको दरिद्र मानसिकताको उपज हो । विमानस्थल भिजिबिलिटीको समस्या भोगिरहेको गौतमबुद्ध अन्तर्राष्ट्रिय विमानस्थलमा आरएनपी एआर प्रणाली जडान नहुँदा जाडोयाममा कुहिरोका कारण समस्या भएको हो । केही महिना अन्तर्राष्ट्रिय उडान प्रभावित भैरहँदा विमानस्थल नै बन्द भएजस्तो गरी कुप्रचार गरिनु नियोजित मानसिकताको उपज हो । ढिलै भएपनि आईएलएस प्रणाली जडान गर्न भारतले अनुमति नदिएपछि नागरिक उड्ययन प्राधिकरणले आरएनपी एआर प्रणाली जडान गर्न लागेको छ । माघ महिनामा यो सिस्टम जडान भएपछि भिजिबिलिटीको समस्या समाप्त हुने विश्वास गरिएको छ । विश्वका धेरै देशका विमानस्थलहरूमा र वायुसेवामा प्रयोग भइसकेको यो प्रणाली भू–उपग्रहमा आधारित हुन्छ । उपकरणमा आधारित उडान अवतरण प्रणाली (आईएलएस) प्रविधिको विकल्पमा आरएनपी–एआर भनेर चिनिने प्रविधि त्रिभुवन अन्तर्राष्ट्रिय विमानस्थलमा यसअघि नै प्रयोगमा आइसकेको छ । तसर्थ गौतमबुद्ध अन्तर्राष्ट्रिय विमानस्थल नचलोस् भन्नेहरूको दिवा सपना कुनैपनि अवस्थामा पूरा हुन सक्दैन् । नेपाल नागरिक उडड्यन प्राधिकरणले आउँदो माघ १० गतेदेखि आरएनपी एआर प्रणाली शुरू हुने जनाएको छ ।

आरएनपी–एआर प्रणालीको सहायताले गौतमबुद्ध अन्तर्राष्ट्रिय विमानस्थलमा न्यूनतम आठसय मिटरको भिजिबिलिटीमा पनि जहाजहरू सहजरूपमा उडान र अवतरण हुनसक्ने छ । यो विमानस्थलमा जाडो महिनामा १२ सय मिटर भिजिबिलिटी हुने गरेको छ । अतः विमानस्थल चल्दैन कि भन्ने सपना बोकेर बसेकाहरूको सपनामा अव तुषारापात हुने निश्चित छ । सरकारले भैरहवाको गौतमबुद्ध अन्तर्राष्ट्रिय विमानस्थल सञ्चालनका लागि लिएको पहल अत्यन्त सार्थक र महत्वपूर्ण छ । सरकारले नचाहेको भए यो विमानस्थल गौचरन प्रमाणित हुने अवस्था थियो । पछिल्लोपटक भिजिबिलिटीको कारण देखाउँदै तीनवटा बिमान कम्पनीले तीन महिनाका लागि आंशिकरूपमा उडान स्थगन गरेपनि यसैलाई तिललाई पहाड बनाउने काम नगरौं । पर्यटक नेपाल आउने याममै काठमाण्डौंको त्रिभुवन अन्तर्राष्ट्रिय पिमानस्थल मर्मतका लागि दैनिक १० घन्टा बन्द हुँदा चिन्तित पर्यटन व्यवसायीमा भैरहवामा अन्तर्राष्ट्रिय उडान सुरु हुनु उत्साहको कुरा हो । त्यसो त सरकारको प्रोत्साहनकै कारण भैरहवामा उडान सुरु गर्न वायुसेवाहरू तयार भएका हुन् । अवको दिनमा भैरहवाबाट अन्तर्राष्ट्रिय उडान निरन्तर गर्न वायुसेवाहरूलाई प्रोत्साहित गर्नुपर्ने अवस्था छ भने अर्कातिर हालका दिन बढेको हवाई भाडा नियन्त्रण गर्नुपर्ने बाध्यता पनि सरकारमाथि छ । धेरैले काठमाडौंस्थित त्रिभुवन विमानस्थल मर्मत सकिएपछि भैरहवाबाट हुने अन्तर्राष्ट्रिय उडान बन्द हुने दिवासपना देखेका छन तर त्यो संभव छैन् । काठमाण्डौं पछि भैरहवाबाट अन्तर्राष्ट्रिय उडान समय र यात्रुको मागपनि हो । तसर्थ भैरहवास्थित गौतमबुद्ध अन्तर्राष्ट्रिय विमानस्थल संचालनको निरन्तरतामा कुनै प्रश्न र आशंका जन्मिनु हुँदैन । पछिल्लोपटक गौतमबुद्ध अन्तर्राष्ट्रिय विमानस्थल सम्बद्ध कर्मचारीले नै यो विमानस्थल धेरै चल्दैन भनेर हल्ला फैलाएको भन्दै गलत कुरा बाहिर आयो । त्यो सरासर गलत हो । अव कुनैपनि बहानामा अन्तर्राष्ट्रिय उडान रोकिने अवस्था आउनु हुँदैन । त्यसका लागि नेपाल सरकारले ध्यान दिनु जरुरी छ । भैरहवाबाट अन्तर्राष्ट्रिय उडान हुनु भनेको नेपालको पर्यटन क्षेत्रमा कायापलट हुनु हो । विश्वका एक अर्ब बढी बौद्धमार्गीहरूका लागि लुम्बिनी आस्थाको केन्द्र हो । लुम्बिनी नजिक रहेको यो क्षेत्रबाट अन्तर्राष्ट्रिय उडान हुँदा लुम्बिनी आउने पर्यटक समेत खुसी भएको अवस्था छ । साँच्चै भन्नुपर्दा गौतमबुद्ध अन्तर्राष्ट्रिय बिमानस्थलले यस क्षेत्रमा उत्साहको सञ्चार गरेको छ । यहाँका उद्योगी व्यवसायी, पर्यटन व्यवसायी सवै अन्तर्राष्ट्रिय उडानबाट उत्साहित भएका छन् । अव यसको स्थायित्वमा पनि यहाँका आम सरोकारवालाको ध्यानाकर्षण जरुरी छ ।