खोज

जीतपुर, १८ मंसिर ।
मंसिर १९ गतेदेखि पौष २ गतेसम्म बुद्ध रंगशालामा १५औँ कपिलवस्तु महोत्सव आयोजना हुँदैछ । महोत्सवमा नयाँ प्रतिभा र पुराना अनुभवी व्यक्तिहरूको क्षमता प्रदर्शन गरिने आयोजक समितिले जनाएको छ ।
महोत्सवको मूल आयोजक समितिका अध्यक्ष गणेश बहादुर क्षेत्रीले नयाँ र अनुभवी सदस्यहरूको संयोजनले काम सहज भएको बताए। संघमा स्थापना कालदेखि सक्रिय क्षेत्रीले यसपटकको महोत्सवलाई आफ्ना अनुभव र नयाँ साथीहरूको भिजनले थप आकर्षक बनाउने बताए।महोत्सवलाई व्यवस्थित बनाउन २९ उपसमिति गठन गरिएको छ । यसमा नयाँ अनुहारसँगै अनुभवी सदस्यहरूलाई जिम्मेवारी दिइएको छ। महासचिव नवदत्त घिमिरे, जो पहिलोपटक मुख्य भूमिकामा छन्, कार्यक्रम सञ्चालनदेखि समापनसम्म आफ्नो नेतृत्वदक्षता प्रस्तुत गर्ने छन् ।
पास व्यवस्थापन संयोजक कृष्ण प्रसाद गैरेले यसपटक पास वितरणमा कडाइ गरिने र अनियमितता हुन नदिने प्रतिबद्धता जनाए। भान्छा व्यवस्थापन संयोजक नारायण पौडेलले मितव्ययी रूपमा काम गरेर संघलाई आर्थिक भार कम गरिने बताए । यसपटक महोत्सवको प्रमुख आकर्षणमध्ये एक “डान्स आइडल“ हुनेछ । १३औँ संस्करणका लागि विष्णु मल्लको नेतृत्वमा कार्यक्रम निष्पक्षताका साथ सञ्चालन गरिनेछ । महोत्सवका निर्देशक हुमानाथ पौडेलले साना विवरणमा समेत ध्यान दिँदै नयाँ जोश र पुराना अनुभवलाई एकीकृत गरिएको बताए । स्टल, स्टेज, गेट, र सचिवालय व्यवस्थापनमा यसपटक दर्शकले नयाँपनको अनुभव गर्नेछन् ।
मंसिर १९ गते बाजागाजासहित विभिन्न जातजातिका झाँकी प्रदर्शनीसँगै पर्यटन तथा नागरिक उड्ययन मन्त्री बद्री पाण्डेले महोत्सवको उद्घाटन गर्नेछन् । आयोजकको लक्ष्य २ लाख दर्शकको सहभागिता र १० करोड रूपैयाँ बराबरको कारोबार रहेको छ।महोत्सव सुरु हुन अब केही दिनमात्र बाँकी हुँदा अन्तिम तयारी तीव्र पारिएको संयोजक क्षेत्रीले जानकारी दिए । यसपटक फुटकरभन्दा होलसेल पद्दतिमा व्यवस्थापन गरिएकाले खर्चमा कटौती हुने अपेक्षा छ । दर्शकका लागि यो महोत्सव नयाँपन र उत्कृष्ट व्यवस्थापनको प्रतीक बन्ने आयोजकहरूको विश्वास छ ।