खोज

दाङ,१८ मङ्सिर ।

दाङको नेपाल भारत सिमा क्षेत्र खांग्रानाकामा अन्तर स्थानीय तह स्तरिय घुम्ती बैठक सम्पन्न भएको छ । बैठकमा पालिकाहरुले हालसम्म गर्दै आएका असल अभ्यासका बारेमा जानकारी गराउँदै देखा परेका समस्या, कानूनी जटिलताका बारेमा राजपुर गाउँपालिका अध्यक्ष शरद बुढाथोकीले जानकारी गराएका थिए ।

पालिकाका प्रमुख, उपप्रमुखहरुले नदीजन्य पदार्थको उत्खखन्, व्यवस्थापनमा बारम्बार समस्या देखा परिरहेको हुँदा यसको दिगो समाधानको उपाय निकाल्नु पर्ने आवाज उठाएका छन् ।

नदीजन्य पदार्थको चोरीनिकासी बढ्दै गएको, रोकथामका लागि पालिकाको प्रयासले मात्रै सम्भव नभएको भन्दै यसको समाधानमा माथिल्लो निकायले पहल गर्नुपर्नें धारणा राखेका छन् ।

बैठकमा घोराही उपमहानगरपालिका नगरप्रमुख नरुलाल चौधरी, तुलसीपुर उपमहानगरपालिका नगरप्रमुख टीकाराम खड्का, सहायक प्रमुख जिल्ला अधिकारी सावित्रा पुन, लमही नगरपालिका उपप्रमुख लक्ष्मी योगी, गढवा गाउँपालिका अध्यक्ष यमनारायण पोख्रेल, बंगलाचुली गाउँपालिका उपाध्यक्ष भक्तबहादुर जिसी, दंगीशरण गाउँपालिका उपाध्यक्ष पीमाकुमारी खड्का, राप्ती गाउँपालिका उपाध्यक्ष कमलापति चौधरीलगायतले पालिकाहरुबाट भईरहेका काम र देखा परेका समस्याहरुको बारेमा निकास खोज्न समन्वय बैठकमार्फत आग्रह गरेका थिए ।

स्थानीय सरकार आफैमा स्वात्त सरकार भएकाले संविधानले दिएको अधिकारको पालना गर्दै अघि बढ्नुपर्ने निष्कर्ष निकालिएको छ । बैठकमा प्रमुख अतिथि राष्ट्रपति चुरे तराई मधेश संरक्षण समिति सदस्य कमला वलीले भुमिकामा रहेका हरेक व्यक्तिमा इमान्दारिता आवश्यक रहेको बताइन ।

उनले राष्ट्रपति चुरे तराई मधेश संरक्षण समितिले स्थानीय तहले नीति नियमको सही रुपमा पालना गरेमा कोही कसैलाई पनि रोकावट नगरेको बताइन । राजपुर गाउँपालिका उपाध्यक्ष धनपति देवी यादवको स्वागतबाट शुरु भएको कार्यक्रममा गाउँपालिका अध्यक्ष शरद बुढाथोकीले पालिकाले गर्दै आएका असल अभ्यास, उपलब्धि र चुनौति बारे जानकारी गराएका थिए । जिल्ला समन्वय समिति दाङका प्रमुख नित्यानन्द शर्माको अध्यक्षता तथा राष्ट्रपति चुरे तराई मधेश संरक्षण समिति सदस्य कमला वलीको प्रमुख आतिथ्यमा आज राजपुर गाउँपालिका वडा नम्बर ६ को खांग्रानाकामा अन्तरपालिका स्तरीय घुम्ती बैठक सम्पन्न भएको हो । कार्यक्रमको सहजीकरण जिल्ला समन्वय समितिका विमला पाण्डेले गरेकी थिइन् ।

जिल्ला समन्वय समितिको सहजीकरणमा जिल्लाका पालिकाहरुले समन्वयात्मक घुम्ती बैठक बस्दै आएको छ । आगामी बैठक बबई गाउँपालिकामा बस्ने भएको छ ।