खोज

कपिलवस्तु, १७ मंसिर।
कपिलवस्तुमा युएसएआइडी प्रारम्भिक कक्षा सिकाइ बिद्यालय अनुदान कार्यक्रमको शुभारम्भ गरिएको छ । गुणस्तरीय प्रारम्भिक कक्षा सिकाइ सेवा प्रवाहमा संघ, प्रदेश र स्थानीय सरकारको क्षमता विकास गर्ने मुख्य उदेश्य सहित यो कार्यक्रम जिल्लाको यशोधरा गाउँपालिकामा आइतबारबाट औपचारिक रुपमा प्रारम्भ गरिएको हो ।

यसोधरा गाउँपालिकामा सञ्चालित सामुदायिक विद्यालयहरूमा अनुदान वितरण कार्यक्रमको लुम्बिनी प्रदेशका सामाजिक विकाश मन्त्री जन्मजय तिमिल्सिनाले औपचारिक रूपमा शुभारम्भ गर्नुहुँदै यो कार्यक्रमबाट प्रदेश सरकारको प्रारम्भिक कक्षामा शैक्षिक पहुँच तथा गुणस्तरमा सुधार ल्याउने लक्ष्य प्राप्तिमा कोशेढुङ्गा सावित हुने विश्वास ब्यक्त गरे । साथै युएसएआइडीबाट थालनी भएको प्रारम्भिक कक्षाको सिकाइ सुधार निश्चित रुपमा अत्यावश्यक रहेको र यसबाट उच्च कक्षाहरुको सिकाइमा समेत राम्रो नतिजा ल्याउनमा महत्वपूर्ण योगदान पुग्ने कुरा बताए ।

त्यसैगरी, कार्यक्रममा लुम्बिनी प्रदेशका सामाजिक विकास मन्त्रालयका प्रदेश सचिब भुपेन्द्र थापाले विद्यालय अनुदान कार्यक्रमलाई प्रभावकारी रूपमा कार्यान्वयन गरी शैक्षिक सुधारको यस अभियानमा सबै स्थानीय सरकारहरू तथा विद्यालयहरूलाई जिम्मेवार भएर आवश्यक समन्वय, सहकार्य र साझेदारीका आधारमा प्रभावकारी रूपमा कार्यान्वयन गर्न आग्रह गरे ।

युएसएआइडी परियोजना निर्देशक डा। आनन्द पौडेलले प्रदेश तथा स्थानीय सरकारका शिक्षासम्बन्धी नीति तथा प्राथमिकता पूरा गर्नका लागि शिक्षा, विज्ञान तथा प्रविधि मन्त्रालय र अन्तर्गतका निकायहरू तथा प्रदेशस्तरमा शिक्षा हेर्ने मन्त्रालयसँग साझेदारी एवम् सहकार्य गरिरहेको बताए ।

सन् २०२३ बाट शुरु भई २०२८ सम्म चल्ने यो कार्यक्रमले शिक्षा योजना तथा नीतिहरू मार्फत सिकाइ उपलब्धि सुधारमा सुनिश्चितताका लागि स्थानीय, प्रदेश र संघीय तहको क्षमता विकासमा प्राविधिक सहायता प्रदान गर्नेछ ।

यस कार्यक्रममा यशोधरा गाउँपालिकाका ३९ विद्यालय तथा मदरसामा लागू हुने कार्यक्रम संयोजक मोहित मिश्रले बताए । यस कार्यक्रममा ३९ विद्यालय तथा मदरसाका विद्यालय व्यवस्थापन समितिका अध्यक्ष, प्रधानाध्यापक, मौलाना, मौल्बी, ८ वटै वडाका वडाध्यक्ष, गाउँपालिकाका अध्यक्ष, उपाध्यक्ष, प्रमुख प्रशासकीय अधिकृत, गाउँ शिक्षा समितिका पदाधिकारीहरु, कपिलवस्तु जिल्ला समन्वय समितिका प्रमुख, जिल्ला प्रशासन कार्यालयका सहायक प्रमुख जिल्ला अधिकारी, शिक्षा विकास तथा समन्वय इकाई प्रमुख लगायतको सहभागिता रहेको थियो ।