खोज

बुटवल, १७ मंसिर । नेपाली सेनाले द्धन्द्ध र कर्तब्यपालनाको दौरान वीरगति प्राप्त गरेका सकल दर्जाका उत्कृष्ट एकल महिलाहरुलाई सम्मान गरेको छ । सोमबार जंगिअडडामा भएको विशेष कार्यक्रममा नेपाली सेनाका प्रधान सेनापति महारथी अशोक राज सिग्देलले एकल महिला पश्चात आफनो अध्ययनलाई निरन्तरता दिई उच्च शिक्षा हासिल गरेकी नारायणी कंडेल र आफनो सन्ततीलाई उच्च शिक्षा हासिल गर्न प्रेरणा दिई सफल अभिभावकत्व निर्वाह गर्ने रिता भण्डारीलाई जनही नगद ४० हजार रुपैयासहित विशेष सम्मानबाट सम्मान गरेका हुन ।

कार्यक्रममा नेपाली सेनाका प्रधान सेनापति महारथी सिग्देलले द्धन्द्ध तथा कर्तब्यपालनाको दौरान वीरगति प्राप्त गरेका सकलदर्जाका एकल महिलाहरुसंग अन्तरक्रिया गर्दै आगामी दिनहरुमा आवश्यक सहयोग गर्ने प्रतिवद्धता ब्यक्त गरे । एकल महिलाहरु समाजमा विभिन्न उद्यममार्फत आफु लगायत आफना सन्ततिहरुलाई स्थापित गराउन सफल रहेको समेत उनको दाबी छ ।

यसैगरि सेनापति सिग्देलले वीरगति प्राप्त सकल दर्जाका परिवारहरुलाई नगद र दोसल्लासहित सम्मान गरेका थिए । नेपाली सेनाले वीरगति प्राप्त तथा कर्तब्यपालनको सिलसिलामा मृत्यु भएका सकल दर्जाका एकल महिलाहरु एवं पारिवारिक निवृत्तिभरणमा रहेका एकल महिलाहरुलाई प्रदान गरिदै आएको कल्याणकारी निवृत्तिभरणमा मासिक पाच सय रुपैया थप गरेर प्रदान गर्दै आएको छ । बीरगतितर्फ मासिक ३ हजार ५ सय रुपैया र कर्तब्य पालनातर्फ मासिक २ हजार ५ सय रुपैया प्रदान गरिरहेकोमा असोज महिना पाच सय रुपैयाले थप गरिएको हो ।