खोज

दाङ, १६ मङ्सिर ।

दाङमा एचआइभी एड्स संक्रमितहरुको संख्या वर्षेनी बढदै गएको पाईएको छ । ३७ औं विश्व एड्स दिवसका अवसरमा दाङको घोराहीमा जनस्वास्थ्य कार्यालयले जानकारी गराएको छ । दाङमा २०८० सालमा ४ सय ४ जना एचआइभी संक्रमित रहेकोमा यो वर्ष ३३ जनाको पहिचान भएर ४ सय ३७ पुगेको जनस्वास्थ्य कार्यालयले जानकारी दिएको छ ।

समुदाय स्तरमा पुगेर एचआईभी संक्रमित पहिचान गर्न थालिएसँगै जिल्लामा संक्रमितहरु थपिने क्रम बढेको छ । यो वर्ष ३३ जना नयाँ संक्रमित फेला परेका छन् । अघिल्लो वर्ष जिल्लामा ४३ जना एचआईभीका नयाँ बिरामी थपिएका थिए । यो वर्ष राप्ती स्वास्थ्य विज्ञान प्रतिष्ठान घोराहीमा २ सय ८५ जना र प्रादेशिक अस्पताल तुलसीपुरको एआरटी सेन्टरबाट १ सय ५२ जना एचआईभी संक्रमितले उपचार गराईरहेका छन् ।

एचआईभी संक्रमणको उच्च जोखिममा रहेका समुहहरुमा सुईद्वारा लागू पदार्थप्रयोग गर्नेहरु, यौनकर्मी, पुरुष समलिंगी तथा तेश्रो लिंगीहरु र रोजगारीका लागि विदेश गएर फर्किएकाहरु रहेका छन् ।

राप्ती स्वास्थ्य विज्ञान प्रतिष्ठान घोराहीको एआरटी सेन्टरकी काउन्सिलर तारा बिसीका अनुसार, वैदेशिक रोजगारीमा गएर फर्किएकाहरु १ सय ५० जना एचआईभी संक्रमित भएका छन् । १५ वर्षदेखि माथि उमेर समुहमा १ सय ३७ जना महिला र १ सय २९ जना पुरुष रहेका छन् भने ७ जना अन्य रहेका छन् । यसैगरी, १५ वर्ष मुनि उमेर समुहका ४ जना महिला र ८ जना पुरुष रहेका छन् । जसमध्ये १५ जना यौनकर्मी, २३ जना पुरुष समलिंगी, ५९ जना आप्रवासी कामदार, ७ जना अन्य र ३१ जना आमाबाट बच्चामा सरेका रहेका छन् । अस्पताल आउनेहरुमाथि शंका लागेमा एचआईभी प्रि र पोष्ट टेस्ट, काउन्सिल, औषधी सबै निशुल्क उपलब्ध हुने गरेको छ । पहिचान भएका बिरामीलाई सचेत गराउँदै आउने दिनमा हुने थप जोखिम कम गर्न निरन्तर काउन्सिलिङ गर्ने गरिएको राप्ती स्वास्थ्य विज्ञान प्रतिष्ठानकी एआरटी काउन्सिलर बिसीले बताइन् ।

पहिचान भएका एचआईभी संक्रमितहरुलाई निगरानी राख्दै नियमित एआरभी सेन्टरबाट औषधी सेवन गराउनुका साथै मनोसामाजिक परामर्शको पनि दिएको उनले बताइन् ।

प्रादेशिक अस्पताल तुलसीपुरको एआरटी सेन्टरबाट पहिचान भएका १ सय ५२ जनामा सेवा लिइरहेका छन् । तुलसीपुरका ८३ जना, शान्तिनगरका १५ जना, बबईका २३ जना, दंगीशरणका १० जना, लमहीका २ जना, घोराहीका १० जना, जिल्ला बाहिरका ९ जनाले उपचार सेवा लिईरहेका एआरटी काउन्सिलर प्रमिला लामिछानेले जानकारी दिइन् । उनका अनुसार, १५ वर्षदेखि माथि उमेर समुहका ७४ जना पुरुष, ७४ जना महिला, १५ वर्ष मुनि उमेर समुहका ३ बालिका र १ बालक रहेका छन् । जसमध्ये ९ जना यौनकर्मी, १ जना लागू पदार्थ दुव्र्यसनी, ३ जना समलिंगी, ४१ जना आप्रवासी कामदार, ९८ जना अन्य प्रकृतिका रहेका उनले बताइन् ।

एचआईभी पहिचान भएका सबै संक्रमितहरुले राप्ती स्वास्थ्य विज्ञान प्रतिष्ठान घोराही र प्रादेशिक अस्पताल तुलसीपुरबाट एआरटी औषधि सेवन गरिरहेका छन् ।
एचआईभी पहिचान र रोकथामका लागि जिल्लामा रहेका मानव स्वास्थ्य समाज, दाङ प्लस, रेडक्रस, परिवार नियोजन संघ, नागार्जुन डेभलपमेन्ट, परिवर्तन समुहलगायत संस्थाले पनि काम गर्दै आएका छन् ।