खोज

चन्द्रौटा(कपिलवस्तु), १६ मंसिर ।

कपिलवस्तुको शिवराज नगरपालिकामा नगर युवा परिषद्का नवनिर्वाचित पदाधिकारीहरुले गोपनीयताको शपथ ग्रहण गरेका छन् । पालिकाका मेयर तथा परिषद्का अध्यक्ष अजय थापाको नेतृत्वमा आइतबार एक कार्यक्रमका बीच पदाधिकारीहरुले गोपनीयताको शपथ ग्रहण गरेका हुन् ।

मेयर थापाले उपाध्यक्षसहित परिषद्का सदस्यहरूलाई सपथ गराउँदै परिषदलाई युवाहरूको नेतृत्वदायी संस्था बनाउन आग्रह गरे । सपथग्रहण कार्यक्रमले युवाहरूलाई नेतृत्व विकास, समुदाय निर्माण र राष्ट्रिय विकासमा योगदान पु¥याउन प्रेरित गर्ने मेयर थापाले जोड दिए ।

यसैबीच राष्ट्रिय युवा परिषदका उपाध्यक्ष सुरेन्द्र बस्नेतले पछिल्लो समय युवाहरूको विदेश पलायन तीव्र भइरहेको विषयलाई उठाउँदै स्वदेशमै स्वरोजगारको वातावरण सिर्जना गर्न नीति तथा कार्यक्रमको आवश्यकता रहेको बताए । उनले भने, ः “देशको समृद्धिका लागि युवाहरूलाई स्वदेशमै रोजगारको वातावरण सिर्जना गर्नु अपरिहार्य छ । युवाले आफ्नो क्षमता र सिर्जनशीलतालाई उपयोग गर्दै देश निर्माणमा योगदान पु¥याउनुपर्छ ।” युवालाई सिर्जनशील, जिम्मेवार र आत्मनिर्भर बन्ने उनले बताए ।

यसैगरी किडार्क नेपालका कार्यकारी निर्देशक गोविन्द शाहीले समाज रूपान्तरणको अभियानमा युवाहरूको सक्रिय सहभागिता अनिवार्य रहेको उल्लेख गरे । उनले युवाहरूलाई गल्ती गर्ने छुट नरहेको बताउँदै पनि युवाहरूको महत्त्वपूर्ण भूमिकाबारे विचार व्यक्त गरे ।

लुम्बिनी प्रदेश युवा परिषद्की सदस्य राधा बस्नेतले लुम्बिनी प्रदेशमा ४३ प्रतिशत जनसंख्या युवा रहेको तथ्याङ्क प्रस्तुत गरिन् । युवाका समस्या समाधानका लागि विशेष नीति र कार्यक्रम आवश्यक रहेकोमा जोड दिइन् । प्रदेश सरकार र स्थानीय तहलाई युवा–मैत्री नीति बनाउन उनले आग्रह गरिन् ।