खोज

बुटवल, १६ मंसिर। महिला समानताका लागी सञ्चार अभियानद्धारा सञ्चालित सामुदायिक रेडियो मुक्ति ९५ थोप्लो ५ बुटवलको अध्यक्षमा पुन : खेमकुमारी पोखरेल ‘दिपु’ को नेतृत्वमा ११ सदस्यीय कार्यसमिति सर्वसम्मत निर्वाचित भएका छन । संस्थाको शनिबार बुटवलमा सम्पन्न १५ औ वार्षिक साधारण सभा तथा छैठौं अधिवेशनबाट उपाध्यक्षमा कबिता अर्याल, सचिवमा सबिता देबि निरौला, कोषाध्यक्षमा राधिका न्यौपाने, सह–सचिवमा उमा अर्याल ढकाल तथा सदस्यहरुमा किस्मती कुमारी चौधरी, साबित्रा घिमिरे, सुमित्रा चापागाई, शारदा पहाडी, राधिका सिग्देल, सिता भट्टराई निर्वाचित भएको निर्वाचन समितिका संयोजक तारा पाण्डेले बताईन ।

अधिबेशनको उद्घाटन गर्दै बुटवल उपमहानगरपालिकाका उपप्रमुख तथा रेडियो मुक्तिका सल्लाहकार साबित्रादेबि अर्यालले महिला शसक्तिकरण, महिला हिंसा न्यूनिकरण, लैंगिक विभेदको अन्त्य र सामाजिक जागरण अभियान संञ्चालनमा रेडियोको महत्वपूर्ण योगदान रहेको बताईन । रेडियोबाट उत्पादन भएका कार्यक्रम र यसको प्रभावको विषयमा प्रकाश पार्दै उनले थप स्थानिय महिला, उद्यमलाई जोडेर कार्यक्रम बनाउन आग्रह गरिन । रेडियोको स्तरबृद्धिका लागि स्थानिय सरकार सधै साथ रहेको समेत बताईन ।

कार्यक्रममा संस्थाको वार्षिक प्रगति प्रतिवेदन प्रस्तुत गर्दै अध्यक्ष दिपु पोखरेलले समाजमा देखिएका नकारात्मक विषयहरुको उठान र सकारात्मक विषयहरुको सम्प्रेषण गर्दै रेडियो सभ्य समाज निर्माणमा अग्रसर रहेको बताईन । बिसं. २०६५ सालमा ‘सचेत नारी सचेत परिवार, हरेक क्षेत्रमा समान अधिकार’ भन्ने मुल नाराका साथ लिजको घरमा १०० वाट क्षमताबाट प्रसारण गर्दै आएको रेडियो हाल आफनै भवनमा ५०० वाट क्षमता बिस्तार गर्न सफल भएको बताईन । समुदायको अपनत्व र साथकै कारण रेडियो स्तरवृद्धि र रेडियो मुक्ति कल्याणकारी कोष स्थापना गर्न समेत सफल भएको बताईन ।

कार्यक्रममा बुटवल उपमहानगरपालिका वडा नम्वर ४ का अध्यक्ष नरिश्वर शर्मा पौडेल, निवर्तमान अध्यक्ष टंक पराजुली, नेपाल पत्रकार महासंघ रुपन्देहीका अध्यक्ष रामराज पोखरेल, सामुदायिक रेडियो प्रशारक संघ ओकराबका उपाध्यक्ष मिलन गाहाले समाज परिवर्तन गर्न र मार्गदर्शनका लागि रडियो मुक्तिको योगदानबारे प्रकाश पारे ।

रेडियो मुक्ति महिलाहरुद्धारा स्थापित र संञ्चालित नेपालको पहिलो सामुदायिक रेडियो दैनिक १७ घण्टा प्रसारण भैरहेको छ । जसमा हाल १५० जना संस्थापक सदस्य छन । रेडियोको प्रसारण रेडियो सेटमा ९५.५, इन्टरनेट अनलाईनमा रेडियोको वेवसाईट र मोबाईल एप्लीकेसनको हाम्रो पात्रोेमा समेत संसारभर सुन्न सकिन्छ । यसैबिच कार्यक्रममा रेडियोकी प्राविधिक सिता पौडेल उत्कृष्ट कर्मचारीबाट सम्मानित भएकी छिन ।