खोज

बुटवल, १६ मंसिर ।

तितेपाती महिला बचत तथा ऋण सहकारी संस्थाको बाह्रौं वार्षिक साधारण सभा शनिबार भव्य रूपमा सम्पन्न भएको छ । संस्थाका अध्यक्ष कमला बस्नेत कुँवरको अध्यक्षतामा आयोजित सभाको नेफ्स्कूनका केन्द्रीय सञ्चालक ज्ञानु पौडेलले उदघाटन गरेकी थिइन् ।

त्यस अवसरमा पौडेलले महिलाहरूको नेतृत्वमा सञ्चालन भइरहेका सहकारीहरू सुशासन र पारदर्शिताका कारण समस्यारहित रहेको बताइन् । उनले सहकारी क्षेत्रका केही समस्या जस्तै क्षेत्राधिकार भन्दा बाहिर शाखा खोल्ने, अनुगमन नगर्ने र अव्यवस्थित लगानीले चुनौती निम्त्याएको औँल्याइन् । परिवारले ऋण लिँदा महिलाहरूलाई साक्षी राख्ने प्रचलनले कालोसूचीमा महिलाहरू परिरहेको भन्दै हस्ताक्षर र साक्षी बस्न महिलाहरूलाई चनाखो बन्नुपर्ने उनको सुझाव थियो ।

बुटवल उपमहानगरपालिका वडा नं. ९ का वडाअध्यक्ष प्रदीपकुमार श्रेष्ठले सहकारीले महिलाहरूको सशक्तिकरणमा पुर्याएको योगदानको प्रशंसा गर्दै संस्थालाई उद्यमशीलतामा केन्द्रित हुँदै अगाडि बढ्न आग्रह गरे । राष्ट्रिय सहकारी बैंक पोखरा शाखाका प्रमुख रुक्मगत श्रेष्ठले महिलाहरूले सञ्चालन गरेका सहकारीहरूमा निडर भएर काम गर्न सकिने विश्वास व्यक्त गरे ।

सभामा संस्थाका अध्यक्ष कमला बस्नेत कुँवर र कोषाध्यक्ष शान्ती लक्ष्मी अर्यालले प्रस्तुत गरेको आर्थिक वर्ष २०८०÷८१ को प्रगति प्रतिवेदन र आर्थिक प्रतिवेदन पारित गरिएको छ ।

कार्यक्रममा संस्थाका दुईजना ज्येष्ठ आमाहरू, असल बचतकर्ता, असल ऋणी, उत्कृष्ट शैक्षिक नतिजा हासिल गर्ने विद्यार्थी, दृष्टिविहीन सदस्य र बालबचतमा उत्कृष्ट योगदान पुर्याउने सदस्यहरूलाई सम्मान गरियो ।

१७ सय महिला सदस्यहरू मात्र रहेको सहकारीको साधारण सभामा सदस्यहरूले उत्पादन गरेका वस्तुहरूको प्रदर्शनीले सहकारीको उद्यमशीलताका आयामलाई उजागर गरेको थियो ।

साधारण सभाले संस्थाको पारदर्शिता, सुशासन र आर्थिक सुदृढतालाई अझ प्रभावकारी बनाउँदै लैजाने योजनामा जोड दिएको छ । कार्यक्रममा संस्थाका सचिव गौरा केसीले पनि आफ्नो धारणा राखेकी थिइन् ।