खोज

मुख्यमन्त्रीको मोबाईलमा घण्टी बजिरह्यो तर उनले उठाएर कुरा गरेनन् । उनको ध्यान एकोहोरो कलाकारका गीत, संगीत सुन्नतिरै केन्द्रीत रह्यो । संगीतकार सुरेश सेञ्जुरीले हार्मोनियम बजाई रहे । तबला वादकले गीत, संगीतको लय समाते । सरिता पन्थी सुनार र वसन्त खनालले आफ्ना स्वर पोखे गीतमा । सायद उनीहरूका कोकिल स्वरले लुम्बिनी प्रदेशका मुख्यमन्त्री चेतनारायण आचार्यको मन खिचिरह्यो । मंसिर १४ गते, शुक्रवार विहानको समय थियो । सधैं भौतिक विकास निर्माणका कुरा, शिलान्यास, उद्घाटन, गोष्ठी, सेमिनार, तालिम र बैठकमा व्यस्त रहने मुख्यमन्त्री यसपाली सुरेश सेञ्चुरीको संगीतमा झुले । संगीतले सबैको मन खिच्दोरहेछ । दुःख, पीर बिसाउने चौपारी नै गीत, संगीत रहेछ । सधैंको दौडधूप, तनावलाई थाँती राखेर मुख्यमन्त्रीले कलाकारका गीत, संगीत सुन्नका लागि जुन समय उपलब्ध गराए, यसले नै लुम्बिनी प्रदेशका मुख्यमन्त्री संगीतप्रेमी रहेछन् भन्ने कुराको थप प्रमाण जुटायो ।
लेखक तथा साहित्यकार डीबी गुरुङले लुम्बिनी प्रदेश सरकारको सय दिनको उल्लेख गर्दै शब्द, रचना गरेका थिए । सरकारले सय दिनमा गरेका र पक्रेको कार्यदिशालाई मध्यनजर गरेर उनले गीतमा सार खिचेका थिए । सुशासनका लागि सरकारले आफ्नो अभियान सञ्चालन गरेको, भ्रष्टाचारलाई न्यूनीकरण गर्न भूमिका निर्वाह गरेको र प्रदेशले कृषि, उद्योग र पर्यटनलाई आधार बनाएर आत्मनिर्भर प्रदेश बनाउने योजना तयार पारेको समेत गीतमा समाविष्ट गरेका छन् । त्यतिमात्र होइन,उनले गीतमा प्रदेश सरकार शिक्षा, स्वास्थ्य र रोजगार उन्मुख हुनुपर्ने र सोही अनुरूप अघि बढ्दै स्थायी र दीगो प्रदेशका लागि अघि बढ्न सन्देश समेत दिएका छन् । चारैतिरबाट प्रदेश चाहिन्न भन्ने कुरा आइरहेको बेला प्रदेशलाई दीगो र स्थायी बनाउँदै जनताको सरकार र दैलोको सरकार प्रदेश सरकार हो भन्ने खालको औचित्यता प्रमाणित गर्नका लागि समेत प्रदेश सरकारलाई घच्घाएका छन् ।
गीतको एउटा अन्तरामा गुरुङले लेख्छन् –
स्वास्थ्य, शिक्षा, रोजगारमा, जनताको सरकार बनोस् ।
प्रदेशलाई दीगो राखी, सधैंभरि अघि बढोस् ।
विकासका अनेकौं विकल्प र सम्भावना रहेको लुम्बिनी प्रदेशले समृद्ध लुम्बिनी : सुखी नागरिकको संकल्प बोेकेको छ । यो उसको नारा हो । यसलाई साकार बनाउन यसले हरप्रयास जारी राखेको छ । ओठेभजन गाएरमात्र समृद्धि नआउने कुरामा मुख्यमन्त्री ढुक्क छन् । त्यसैले उनी प्रदेशको नीति, योजना, कार्यक्रम, कार्ययोजना तयार गरेर कार्यान्वयनको मार्गमा दिनरात नभनी दौडिरहेका छन् । परिणामको खोजीमा छन् । असल कर्मको परिणाम फलदायी हुन्छ भन्नेमा मुख्यमन्त्री अति नै विश्वस्त छन् ।
त्यसैले गीतको अर्को अन्तरामा भनिएको छ –
विकासका छन् यहाँ, अनेक विकल्प
समृद्ध र सुखी नागरिक हाम्रो संकल्प
यही हो नारा हाम्रो
समृद्ध लुम्बिनीः सुखी नागरिक ।
साविकका लुम्बिनी, भेरी र राप्ती अञ्चल जोडिएर बनेको लुम्बिनी प्रदेश सरकारले भाषा, कला, साहित्य, संस्कृतिमार्फत यहाँको एकीकृत भाव र मनोविज्ञानलाई जोड्नका लागि प्रज्ञाप्रतिष्ठान गठन गरी अघि बढ्ने योजना रहेको माननीय मुख्यमन्त्रीले कलाकारहरूलाई जानकारी गराउँदै थिए । त्यसोभन्दा लुम्बिनी वाङ्मय प्रतिष्ठानका केन्द्रीय अध्यक्ष ऋषि आजादले समर्थनको टाउको हल्लाए । उनले मुख्यमन्त्रीलाई धन्यवाद दिदैं प्रज्ञा प्रतिष्ठान गठनका लागि छिट्टै ऐन ल्याउन अनुरोध समेत गरे ।
गीतमा रागश्री संगीतालयका सञ्चालक एवम् विगत ३५ वर्षदेखि गीत, संगीतमा लागिपरेका सुरेश सेञ्चुरीले संगीत भरेका थिए । अनगिन्ती गीतहरूमा संगीत भरेका उनले लुम्बिनी प्रदेश सरकारको सकारात्मक कामको प्रचारका लागि गीत गाउन पाउँदा खुसी लागेको उल्लेख गरे । आफूहरू तटस्थ रहेर गीत, संगीतमार्फत राम्रो कामको बयान गर्न र प्रचार गर्न नचुक्ने बताए । सोही क्रममै युवा साहित्यकार रामचन्द्र श्रेष्ठले भूगोल र भावनालाई समेटिएको गीत रहेको बताउँदै राम्रो कामको प्रचारप्रसारका लागि गीत, संगीतलाई माध्यम बनाउनु उत्तम र आवश्यक रहेको सुनाए ।
कार्यक्रममा लुम्बिनी प्रदेशका माननीय एवम् नेकपा एमाले, लुम्बिनी प्रदेश संसदीय दलका उपनेता भोजप्रसाद श्रेष्ठको खास उपस्थिति थियो । उनले कलाकारहरूको कलालाई सम्मानमात्र होइन, जिउन र जाग्न दिनका लागि सरकारको तर्फबाट आवश्यक सहयोग रहने बताए । गीतको सम्पादन, लुम्बिनी प्रदेश सरकार, मुख्यमन्त्री सचिवालयका ग्रामीण विकास विज्ञ युवराज घिमिरेले गरेका थिए । उनले भने– छोटो समयमै लुम्बिनी प्रदेश सरकारले केही जनमुखी र प्रभावकारी काम गर्छ कि भन्ने संकेत देखाएको छ । सुशासनका केही मार्ग कोरेको छ । सरकार अघि जाने बाटो लिइरहेको सबैले आभास गरेका छन् ।
गीतको शीर्षभागमा यसरी भनिएको छ–
समृद्धिको मार्ग देखायो, सुशासनको सन्देशले
अघि जाने बाटो लियो, लुम्बिनी प्रदेशले ।
करिव चार मिनेटको गीत, संगीत र बाँकी १५ मिनेट बुटवल क्षेत्रको साहित्य, कला, संस्कृतिका गतिविधिहरू सुनेपछि कलाकारहरूलाई माननीय मुख्यमन्त्रीले हार्दिकता प्रकट गर्दै धन्यवाद् दिए । कलाकारका हौसलाका लागि आफूसँगै फोटो खिचेर विदा समेत गरे । कलाकारहरूले विदा हुँदै बाहिर निस्केपछि भने–मुख्यमन्त्रीको हार्दिकता र सुन्ने धैर्यताप्रति नतमस्तक छौं ।