खोज

बुटवल, ११ मंसिर ।

पछिल्लो समय नीतिमै समस्या भएको कारण भ्रष्टाचार निकै मौलाउँदै गएको सरोकारवालाहरुले बताएका छन् । तिनै तहमा सवल जनप्रतिनिधि नहँुदा नीतिगत भ्रष्टाचार बढेको छ भने भ्रष्टाचारको दर र दायरा स्थानीय तह, प्रदेश र संघ हँुदै सार्वजनिक संघसंस्था, राजनीतिक दल, न्यायालय, निर्माण कम्पनी जस्ता क्षेत्रहरूमा भ्रष्टाचारको अवस्था हेर्दा डरलाग्दो देखिएको उनीहरुको भनाइ छ ।

सेन्टर फर मिडिया रिसर्चले मंगलबार बुटवलमा आयोजना गरेको भ्रष्टाचार र मिडिया सरोकारवालबिच अन्तरसंवाद कार्यक्रममा भ्रष्टाचार नियन्त्रणमा मिडियाको भूमिका, चुनौतीहरू र सुधारका उपायहरूमाथि गहन छलफल गरिएको थियो । कार्यक्रमका सहभागीले राजनीतिक दल, संचारकर्मी र न्यायालय सुध्रिन जरुरी रहेको बताए । निर्वाचनको बेला जनताले मताधिकार बेच्ने खर्चिलो निर्वाचन प्रणाली हट्नु पर्ने भन्दै राजनीतिक दल र दलीय पद्धतिमा सुधार हुनुपर्ने दाबी गरे । उच्च तहका व्यक्तिको संलग्नता र संरक्षणमै ठूला ठुला भ्रष्टाचारका काण्डहरू मौलाएको र भ्रष्टाचारीले उन्मुक्ति पाएको सहभागीहरुले बताए ।

कानूनलाई धज्जी उडाउने र कार्यान्वयनमा कमीले पनि अनियमितता बढाएको उनीहरुको भनाइ छ । तीन तहकै सरकारले राजनीतिक दलहरुमा भ्रष्टचार बिरुद्ध बहस छलफल चलाउन जरुरी रहेको बताए । पछिल्लो समय संचारगृह र संचारकर्मी पनि राजनीतिक दलको मुखपत्र हुँदा पूर्वाग्रही भएर समाचार तयार पर्दा त्यसले समाज र देशमा भ्रम फैलाउने र बिश्वसनियता नहुने भन्दै संचारकर्मीहरुले पनि निश्पक्षताको आधारमा समाचार लेख्नु पर्ने बताए ।

संचारमाध्ययम पनि भ्रष्टाचार कम गर्ने माध्ययम बन्न सक्ने बताउँदै उनीहरुले भ्रष्टाचारको अन्त्य र सुशासन प्रवद्र्धनका खोजमुलकद्वारा समाजलाई सकारात्मक सुचना दिन अनुरोध गरे ।

अन्तरसंवादमा कार्यक्रममा वरीष्ठ पत्रकार हरिबहादुर थापा र सेन्टर फर मिडिया रिसर्च नेपालका तिलक पाठकले अवधारणा प्रस्तुत गरेका थिए । छलफल करिव ३ घण्टा चलेको थियो । संवादमा लुम्बिनी प्रदेश सभा सदस्य भोजप्रसाद श्रेष्ठ लगायत अन्य संरचारकर्मीहरको उपस्थिति रहेको थियो ।

सहभागीहरले भ्रष्टाचारका घटनाहरू उजागर गर्ने काममा मिडियाले मात्र होइन, समाजका सबै तह र तप्काको सहयोग आवश्यक रहेको भन्दै मिडियाको सक्रिय भूमिका बिना भ्रष्टाचार न्यूनीकरण असम्भव रहेको भन्दै पारदर्शी सूचना सम्प्रेषणलाई प्राथमिकता दिदै अनुसन्धानमूलक पत्रकारितालाई थप प्रवद्र्धन गर्नुपर्ने आवश्यकता रहेको बताए ।