खोज

सुर्खेत, १० मंसिर । दैलेखको चामुण्डाबिन्द्रासैनी नगरपालिका–७ स्थित वडा कार्यालय दुई दिन देखि बन्द छ । कर्मचारी नभएपछि कार्यालय बन्द भएको हो । वडाध्यक्ष इन्द्र चौलागाईंले कर्मचारी नभएको भन्दै आफ्नै वडा कार्यालयमा तालाबन्दी समेत गरे । उनले तालाबन्दी गरेको कुरा सामाजिक सञ्जाल फेसबुक मार्फत जानकारी गराएका थिए ।

उनले भनेका छन्, ‘कर्मचारी नहुञ्जेलसम्मका लागि यो कार्यालय बन्द भएको जानकारी गर्दछु । जम्बुकाँध नगरपालिकामा जानुहोला ।’ जम्बुकाँध चामुन्डा विन्द्रासैनी नगरपालिकाको कार्यालय हो ।

कार्यालयमा वडा सचिवको अभाव भएकाले समस्या भएको नगरपालिकाका सूचना अधिकारी खगेन्द्रबहादुर शाहीले जानकारी गराए । ‘वडा नम्वर सातको कार्यालय नौ नम्वरको वडा सचिवले हेर्दै आउनुभएको छ उहाँलाई दुवैठाउँमा हेर्दा फुर्सद नभएर पनि हुन सक्छ’ शाहीले भने, ‘भोली (मंगलवार)सम्ममा उहाँ कार्यालय जानुहुन्छ होला ।’ शाहीले तीन दिनपछि कार्यपालिकाको बैठक बसेर उचित निर्णय समेत गरिने जनाए । हाल वडा नम्बर ७ को वडा सचिवको जिम्मेवारी वडा नम्बर ९ का वडा सचिव नेत्रबहादुर खड्कालाई थप गरिएको छ ।

दैलेखको चामुण्डा विन्द्रासैनी नगरपालिकाका वडा नम्बर सात मात्र होइन १ र ६ का वडा कार्यालय सचिवविहीन बनेका छन् । नगरपालिकाको ३ असोजको कार्यापालिकको बैठकले करार कर्मचारी हटाएपछि वडा कार्यालय सचिवविहीन बनेका हुन् । पालिकाले सचिव जिम्मेवारी दिएर केही कर्मचारी पठाउन खोजे पनि कर्मचारीले पत्र बुझेका छैनन् भने अरु कर्मचारी पठाउन नगरले सकेको छैन । वडा कार्यालयबाट दिने सेवा सुविधालाई अर्को वडामा गएर लिनु पर्दा समस्या भएको सेवाग्राहीले बताएका छन् ।