खोज

बुटवल, ९ मंसिर । श्री सिद्धबाबा दुर्गा भवानी शिवकुमारी सैजु वृद्धाश्रम पाकापुस्तामा खाद्यान्न सहयोग गरि श्री नेवा सेवा समितिले आफ्नो १९ औ स्थापना दिवस मनाएको छ । आईतबार एक कार्यक्रमका बिच वृद्धाश्रमका अध्यक्ष महेश्वर प्रसाद श्रेष्ठलाई समितिका अध्यक्ष चिरञ्जीवी श्रेष्ठले ४० केजी चामल, ५ केजी दाल, तेल, बिस्कुट, नुन, फलफुललगायत सामग्री हस्तान्तरण गरेका हुन ।

कार्यक्रममा वृद्धाश्रमका अध्यक्ष महेश्वर प्रसाद श्रेष्ठले वृद्धाआश्रम स्थापना गर्दाको स्मरण गर्दै तत्कालिन समयमा संस्थापकहरुबाट जग्गादान र सहयोगबारे चर्चा गरे । ‘धेरै संघर्षबाट आश्रम स्थापना भएको हो ।’—उनले बताए । सिद्धबाबा मन्दिरमा आश्रम स्थापना गर्ने पहिले तयारी गरिएको उनले बताए । मानविय जिवनचक्रमा जन्मदेखि मृत्युसम्मको चरणमा वृद्धा अवस्था सबैभन्दा कठिनाईपुर्ण अवस्था हुने भन्दै उनले तत्कालिन समयमा निक्कै दुरदर्शी सोचका साथ आश्रम निमार्णको काम संस्थापकहरुबाट भएको बताए । शुरुवातमा १५ लाख रुपैया सहयोगबाट अक्षयकोष स्थापना गरिएको थियो । हाल ५० लाख रुपैया अक्षयकोष रकम पुगेको र यसैबाट संचालन खर्च चलेको छ । उमेर ६० वर्ष नाघेको, परिवारमा आफन्त नभएको, स्थानीय सरकारबाट सिफारिसको आधारमा राखिने उनले बताए ।

कार्यक्रममा समितिका अध्यक्ष चिरञ्जीवी श्रेष्ठले सामुदायिक अवधारणामा वृद्धवृद्घाहरुको सेवा भावका साथ आश्रम स्थापना हुनु निक्कै दुरदर्शी भएको बताए । नेवा समिति विशुद्ध सामाजिक संस्था भएको भन्दै सहयोग सामग्री, स्वस्थ्य शिविर लगायतका काम गर्दै आएको भन्दै स्थापना दिवसमा संस्थापकहरुको सम्मान लगायत धेरै कार्यक्रम गर्ने तयारी रहेको बताए ।

कार्यक्रममा महिला अध्यक्ष तारा श्रेष्ठले नेवारी भाषा, संस्कृति र लिपि संरक्षणमा जोड दिएको संस्था सामाजिक क्षेत्रमा समेत अग्रसर रहदै आएको बताईन ।

कार्यक्रममा समितिका सल्लाहकार मानकाजी श्रेष्ठ, बिष्णुप्रसाद श्रेष्ठ, समितिका सहसचिव लक्ष्मण श्रेष्ठले सामाजिक कार्यमा सबैको साथ जरुरी रहेको बताए । विभिन्न दाताहरुको सहयोगमा तल्लो तलामा १६ जना बस्ने मिल्ने एटेज बाथरुम सहितको आठ कोठाहरु छन । माथिल्लो तलामा ४ वटा कोठाहरु छन ।

यसैबिच बुटवल १३ जबईकी लाल कुमारी मगरले वृद्धाश्रमलाई ३६ हजार रुपैया नगद सहयोग रकम हस्तान्तरण गरेकी छिन ।