खोज

दाङ ।

लुम्बिनी प्रदेशका मुख्यमन्त्री चेतनारायण आचार्यले भ्रष्टाचार नियन्त्रणका लागि सरकारको एकल प्रयास मात्र पर्याप्त नभएको भन्दै नागरिक तहबाट खबरदारी गर्न आवश्यक रहेको ताएका छन् ।

आइतबार राप्ती उपत्यका देउखुरीस्थित मुख्यमन्त्री तथा मन्त्रिपरिषद्को कार्यालयमा भ्रष्टाचार विरुद्धको स्वतन्त्र नागरिक समाज मञ्च, प्यूठान का प्रतिनिधिहरूसँगको छलफलमा मुख्यमन्त्रीले भ्रष्टाचार निवारणमा नागरिक सहभागिता अपरिहार्य भएको उल्लेख गरे।

मुख्यमन्त्री आचार्यले सरकार भ्रष्टाचार नियन्त्रणमा दृढ रहेको र यसका लागि पाँचवर्षे रणनीतिक योजना लागू गरिसकेको जानकारी दिए। उनले मन्त्रालय र निकायका लागि १४ बुँदे निर्देशन जारी गरिएको र नागरिकमा बढ्दो निराशालाई आशामा बदल्ने योजनाबद्ध प्रयास भइरहेको बताए।

नागरिक खबरदारीको महत्त्व
मुख्यमन्त्री आचार्यले भने, “भ्रष्टाचार निवारण नागरिक खबरदारी विना सम्भव हुँदैन। म मुख्यमन्त्री भएपछि पहिलो निर्णय पाँचवर्षे रणनीतिक योजना बनाउने प्रस्ताव स्वीकृत गर्नु नै थियो। अब यो योजनाको प्रभावकारी कार्यान्वयनका लागि नागरिक तहबाट निगरानी आवश्यक छ।”

सरकारले पाँच लाखभन्दा माथिका योजनाहरू प्रतिस्पर्धात्मक प्रक्रियाबाट लागू गरेको र यसले योजनामा हुने चलखेललाई रोक्ने दिशामा काम गरिरहेको पनि उहाँले बताए।

प्रतिनिधि मण्डलको ज्ञापनपत्र
भ्रष्टाचार विरुद्धको स्वतन्त्र नागरिक मञ्च, प्यूठानका संयोजक कर्णध्वज केसीको नेतृत्वमा आएको प्रतिनिधि मण्डलले मुख्यमन्त्रीलाई ज्ञापनपत्र बुझाउँदै भ्रष्टाचार नियन्त्रणका लागि थप प्रभावकारी कदम चाल्न आग्रह गर्‍यो। मञ्चले सेवाको नाममा हुने घुस र विकासका नाममा हुने भ्रष्टाचार रोक्न उच्चस्तरीय अनुगमन संयन्त्र बनाउनेमा जोड दिएको छ।

मञ्चका सदस्य ओमभक्त पण्डितले नागरिक गुनासाको छिटो समाधान गर्न, भ्रष्टाचार विरोधी अभियानहरूलाई प्रभावकारी बनाउन, र थालिएका योजना समयमै सम्पन्न गर्नुपर्नेमा जोड दिए।

चिस्यान केन्द्रका समस्याहरू
प्रतिनिधि मण्डलले प्यूठानका दुई चिस्यान केन्द्र निर्माण भए पनि प्रयोगमा नआएको समस्याबारे पनि जानकारी गरायो। यसबारेमा मुख्यमन्त्री आचार्यले कृषि, भूमि व्यवस्था तथा सहकारी मन्त्रालयसँग छलफल गरी उपयुक्त समाधान खोज्ने प्रतिबद्धता व्यक्त गरे।

मुख्यमन्त्रीको भनाइ अनुसार, नागरिकको सक्रिय सहभागिता र निगरानीले भ्रष्टाचार निवारण प्रयासहरूलाई थप प्रभावकारी बनाउने विश्वास गरिएको छ।