खोज

काठमाडौं, ७ मंसिर ।

सत्तारुढ दल नेकपा एमालेले काठमाडौमा जागरण सभा गरेको छ । काठमाडौं, ललितपुर र भक्तपुर तीनवटा जिल्ला कमिटीले शुक्रबार काठमाडौंको दरबारमार्गमा आयोजना गरेको जागरण सभामा बोल्दै प्रधानमन्त्री केपी शर्मा ओलीले देश र जनता प्रमुख कुरा भएकाले देश, जनता, विकास र सुशासनका पक्षमा एमाले दृढ रहेको बताएका छन् ।

पार्टी अध्यक्ष समेत रहेका प्रधानमन्त्री ओलीले पार्टीविरुद्ध अनेक हल्ला चलाइए पनि एमाले भ्रमको पछि नदौडिने बताए । उनले भने ,‘नेकपा एमाले हल्लाको पछि दौडिदैन ।’ नेपाली जनता आफ्नो गौरव कायम गर्दै समृद्ध नेपाल सुखी नेपालीको सङ्कल्पलाई पूरा गर्न अघि बढ्ने ओलीले प्रष्ट पारे । ‘नेपाली जनता भ्रममा पर्दैनन्’, ओलीले भने ।

उनले कम्बोडियाको टेलिकममा लगानी गरेको अफवाह फैलाइरहेको उल्लेख गर्दै तथ्यसहित बहस गर्न चुनौती दिए । कम्बोडियाको टेलिकममा लगानी छ भन्नेहरुलाई कम्बोडिया गएर खोज्न चुनौती दिन्छु’, उनले भने ।‘ भन्नलाई त भने भयो, अमेरिकी बैंकमा आधा लगानी मेरै छ भनिदिए भैगो । हल्ला चलाउनेहरूलाई सुझाव छ, कम्बोडियामा जहाज चढेर ४ घण्टामा पुगिन्छ । यहाँबाट बैंकक गएपछि, त्यहाँबाट ४५ मिनेटमा कम्बोडियामा पुगिन्छ । त्यहीँको लगानी पनि थाहा हुँदैन र ? आरोप लगाउनेले त्यही गएर खोजी गरून् ।’

यो सरकार दशैँ पनि काट्दैन भनी गरिएका भ्रामक प्रचार सरकारले चिर्दै आएको बताउँदै अहिलेको समीकरणले पुरै समय काम गर्ने ओलीले स्पष्ट पारे । उनले वर्तमान सरकारको समीकरण २०८४ सालको निर्वाचनसम्म रहने प्रष्ट पार्दै अराजकता र अस्थिरताको बिपक्षमा रहेर देशमा आर्थिक समृद्धि ल्याउन सबैमा लाग्नुपर्नेमा जोड समेत दिए ।

प्रधानमन्त्री ओलीले भने ,‘अहिलेको समीकरण कायम रहन्छ । अहिलेको समीकरण र सरकारलाई कसैले हल्लाउन सक्दैन ।’ अर्को सत्ता साझेदार नेपाली कांग्रेससँग कुनै समस्या नरहेको पनि ओलीले प्रष्ट पारे । उनले अबको १८ महिनापछि कांग्रेस सभापति शेरबहादुर देउवालाई सरकार हस्तान्तरण गर्ने बताए ।

कानुनविपरीत अपराध गर्नेलाई अहिलेको सरकारले नछाड्ने ओलीले दाबी गरे । देशका सुशासन स्थापनाको लागि सोची, सम्झिकन नेकपा एमाले र कांग्रेस मिलेर सरकार बनाएका ओलीले स्पष्ट पारे । ‘आफैँ सरकारी ठगी गर्ने अरूलाई मुख छाड्ने, अनि अरूलाई गाली गर्ने, कुनै पनि प्रकारको ठगी सह्य हुने छैन’, उनले भने ।

प्रधानमन्त्री ओलीले अहिलेको सरकार आफ्ना मानिसलाई शक्तिमा पुर्याउन र अकुत सम्पत्ति कमाउन नबनेको भन्दैै ओलीले जसले आफ्ना सन्तानलाई अकुत सम्पत्ति थुपारेर अरबौँका मालिक बनाएका छन् उनीहरू आफ्नो विरुद्ध आरोप लगाउँदै हिँडेको समेत बताए । उनले आफूमाथि औँला ठड्याउनेलाई बहसमा आउन चुनौती दिए ।

प्रधानमन्त्री ओलीले बैङ्कको ऋण तिर्नु पर्दैन भन्दै कोही कराउँदै हिँडेको र देशको अर्थतन्त्रलाई ध्वस्त बनाउन ती शक्ति लागेका बताए । ओलीले भने, बैङ्कको ऋण लिएपछि सबैले तिर्नु पर्छ ।’ मान्छेमा भ्रम सृजना गर्ने, जनता उचाल्ने काम गर्न कुनै शक्तिले पनि नहुने बताए ।

समाज र समुदायबीच अनेक खालका विद्वेष फैलाउने काम भएका भन्दै उनले आलोचना गरे । नीति अगाडि सार्न नसक्नेले गाली गलौज गर्ने, अपशब्द प्रयोग गर्ने काम गर्ने काम गरिरहेका ओलीले बताए । ‘घृणा फैलाउने कुरा नेपाली समाजलाई स्वीकार्य छैन’, उनले भने ।