खोज

कपिलवस्तु, ०३ मंसिर ।
कपिलवस्तु जिल्लाको भारत सँग सिमाना जोडिएका क्षेत्रमा सिमाबासी सँग सशस्त्र प्रहरी कार्यक्रम सञ्चालनमा ल्याईको छ । सिमाका जनता सँग जोडिएर सिमा सुरक्षालाई प्रभावकारी बनाउने उदेश्यले सशस्त्र प्रहरीले जिल्लाका १८ वटा सिमा जोडिएका वडा लक्षित गरि कार्यक्रम सञ्चालनमा ल्याएको हो । सशस्त्र प्रहरी बल नेपाल नम्बर २८ गण हेड क्वाटर कपिलवस्तुको आयोजनामा कार्यक्रम अन्र्तगत स्वास्थ्य सम्बन्धि कार्यक्रम सञ्चालनमा ल्याईएको छ । गणले सिद्धार्थ नेत्रालय तौलिहवाको प्राबिधिक सहयोगमा जिल्लाको मायादेवी गाउँपालिका वडा नम्बर ४ चाकलचौडा र यशोधरा गाउँपालिका वडा नम्बर ५ सुठौलीमा आँखा उपचार शिविरको आयोजना गरेको हो । सोमबार महाराजगंज नगरपालिकाको कजरहवामा आँखा उपचार शिविरको आयोजना गर्ने गणको तयारी छ । सिमा अपराध न्युनिकरण गर्ने उद्धेश्यले गणको आयोजना सिद्धार्थ नेत्रालयको प्राबिधिक सहयोग तथा सशस्त्र प्रहरी बलको बर्डर आउट पोष्ट (बिओपी) मर्यादपुरको समन्वयमा बैदौलीमा आयोजित शिविरमा ५४ जना सिमाबासी नागरिकको आँखा परिक्षण गरिएको हो । शिविरमा १८ जनामा मोतियाबिन्दु भेटिएको छ । मोतियाबिन्दु भेटिएका बिरामीको नेत्रालयले निशुल्क अप्रेशनको सेवा दिनेछ । शिविरमा अधिकांस मोतियाबिन्दु, दृष्टीदोष र सामान्य आँखाको संक्रमणका बिरामी फेला परेको सिद्धार्थ नेत्रालयका अस्पताल व्यवस्थापक सुदन बाग्लेले जानकारी दिए । शिविरमा २० जना बिरामीलाई निशुल्क औषधी समेत उपलब्ध गराईएको हो ।

शसस्त्र प्रहरीले सिमा सुरक्षा सिमाका नागरिकको मन जितेर मात्रै सम्भव हुने निष्कर्षका आधारमा स्वास्थ्य सम्बन्धि कार्यक्रम सञ्चालनमा ल्याएको हो । दुई स्थानमा आयोजित शिविरबाट फेला परेका १ सय २७ जना मोतियाबिन्दुका बिरामीको निुशल्क अप्रेशन गर्ने जनाईएको छ । आँखा स्वास्थ्य शिविरको आयोजना पछि भारतिय सिमा जोडिएका जिल्लाका १८ वटा वडाबाट प्रति वडाका २ जना स्थानियलाई कृषी तालिम दिने सशस्त्र प्रहरीको योजना छ । त्यसै गरि गरिब र जेहेन्दार बालबालिकालाई न्यानो कपडा, शैक्षिक सामाग्री, हेयर कटिङ्ग तालिम दिने योजना सशस्त्र प्रहरीले बनाएको छ । सिमाका नागरिकलाई सशस्त्र प्रहरी सँगको सम्बन्ध मित्रवत बनाएर सिमा अपराध न्युनिकरणमा सहयोग पुर्याउने उद्धेश्यका साथ कार्यक्रम सञ्चालन गरिएको सशस्त्र प्रहरी बल नेपाल नम्बर २८ गणका गणपति सशस्त्र प्रहरी उपरिक्षक रामजंग पाण्डेले जानकारी दिए । “सिमाबासी नागरिक सँग सशस्त्र प्रहरीलाई जोड्नका लागि कार्यक्रमहरू आयोजना गर्न बिभिन्न निकाय सँग समन्वय र सहकार्य अगाडी बढाएका छौं । सिमाबासीहरू सँगको सहकार्य बृद्धिले सिमामा हुने अपराध न्युनिकरणमा सहयोग पुग्नेछ ।” सशस्त्र प्रहरी उपरिक्षक पाण्डेले भने ।