खोज

दाङ, ३ मङ्सिर ।

दाङको लमहीस्थित देउखुरी अन्तराष्ट्रिय क्रिकेट रंगशालामा खेलाडीको चहलपहल बढेको छ । मुगुका १७ वर्षका पदम कार्की दृष्टिविहीन हुन् । पदमलाई क्रिकेटमा निकै चासो छ । उनी राम्रो खेल्छन् । नेपालको प्रतिनिधित्व गर्दै पाकिस्तानमा हुने नेत्रहिन टि–२० विश्व कप पुरुष क्रिकेटमा सहभागी हुने अवसर पाएपछि अहिले बन्द प्रशिक्षणमा निकै मेहनत गरिरहेका छन् ।

दाङको लमहीस्थित देउखुरी अन्तराष्ट्रिय क्रिकेट रंगशालामा बन्द प्रशिक्षण पदम जस्तै देशभरबाट छनौट भएका अरु खेलाडी पनि निकै मेहनत गरिरहेका छन् । आवाज दिएर स्टम्प छामेर सेतो बल भुईबाट गुर्काएर फालेपछि क्रिजमा रहेका अर्का दृष्टिविहीन खेलाडीले बललाई ब्याटको सहारामा प्रहार गर्ने काम अहिले उनको दैनिकी बित्ने गरेको छ ।

सागर लामा नेत्रहिन क्रिकेटको सिनियर खेलाडी हुन् । उनले यसअघि नेपालको प्रतिनिधित्व गर्दै अन्तर्राष्ट्रिय प्रतियोगिता खेलिसकेका छन् । यो पटक नेपालको टोली निकै सन्तुलित र परिपक्व देखिएकाले विश्वकप उचाल्ने लक्ष्यका साथ तयारीमा जुटेको सागर बताउछन् । अर्का खेलाडी सन्त पहरीलाई पनि यो पटक नेपालले विश्वकप उचाल्ने विश्वास लागेको छ । बन्द प्रशिक्षणका लागि समय केही कम भएपनि पाएको अवसर पूर्ण सदुपयोग गर्दै कडा मेहनतका साथ तयारी भईरहेकाले यो पटक नेपालले नेत्रहिन विश्वकप क्रिकेटको उपाधि जित्नेमा विश्वस्त छन् । नेत्रहीन क्रिकेट संघ नेपालले नोभेम्बर २१ बाट पाकिस्तानमा हुन लागेको टि–२० विश्व कप पुरुष क्रिकेटका लागि १५ जनालाई समेट्दै उनले खेल खेलिरहेका छन् ।

बन्द प्रशिक्षणमा रमेशबहादुर बानियाँको कतानीमा उपकप्तान दम बहादुर बडैला, सुनिल सुवेदी क्षत्री, सागर लामा, दुर्गादत्त पौडेल, प्रेम बहादुर क्षेत्री, भरत थापा,प्रविन स्याङ्तान, मदन न्यौपाने, अमिश गुरागाईँ, सुनिल रानामगर, नरेश चौधरी पनि सहभागी भएका छन् ।

पुराना तथा अनुभवी खेलाडीसहित केही नयाँ प्रतिभावान खेलाडी समावेश गर्दै विश्वकपको तयारी गरिएकाले यो पटक नेपालको टीम सन्तुलित बनेको कप्तान बानियाँको भनाई छ । टि–२० विश्वकप नोभेम्बर २१ देखि डिसेम्बर ३ सम्म पाकिस्तानमा हुँदैछ । प्रतियोगितामा नेपाल, पाकिस्तान, भारत, श्रीलंका, बंगलादेश, साउथ अफ्रिका, न्युजिल्याण्ड र अफगानिस्तान गरी ८ देश सहभागी हुनेछन् ।