खोज

सुर्खेत, ३ मंसिर ।

स्थानीय तह उपनिर्वाचन अन्तर्गत कर्णालीमा आठवटा पदका लागि ४४ जना भिड्दैछन् । कर्णालीका विभिन्न पालिकामा एक उपप्रमुख, एक गाउँपालिका अध्यक्ष, एक उपाध्यक्ष र ५ वडाध्यक्ष पदमा उपनिर्वाचन हुन लागेको छ । उम्मेदवारी दर्ता गराएका मध्ये ४१ जना राजनीतिक दलका छन् भने तीन जना स्वतन्त्र उम्मेदवार छन् ।
निर्वाचनको लागि नेपाली कांग्रेस, नेकपा एमाले, नेकपा (माओवादी केन्द्र), नेकपा (एकीकृत समाजवादी), राष्ट्रिय स्वतन्त्र पार्टी (रास्वपा), नेपाल मजदुर किसान पार्टी (नेमकिपा), राप्रपा लगायतका दलले उम्मेदवारी दर्ता गराएका छन् ।

जाजरकोटको नलगाड नगरपालिकाको उपप्रमुखका लागि हुन लागेको निर्वाचनमा ६ जनाको उम्मेदवारी दर्ता भएको छ । यस पालिकामा कांग्रेसका तर्फबाट इन्द्रा चन्द सिंह, एमालेबाट सुनिता बोहोरा, माओवादीबाट देवका लामिछानेको उम्मेदवारी दर्ता भएको छ । यस्तै राप्रपाबाट सुनिता पुन रावल, राष्ट्रिय स्वतन्त्र पार्टीबाट पार्वती पुन, नेपाल समाजवादी पार्टी (नयाँ शक्ति)बाट पवित्रा जैसीको उम्मेदवारी दर्ता भएको छ । यहाँ एकीकृत समाजवादीको उम्मेदवारी भने परेको छैन ।

दैलेखको महावु गाउँपालिकाको अध्यक्ष पदका लागि ७ जनाको उम्मेदवारी दर्ता भएको छ । यस पालिकामा नेपाली कांग्रेसबाट झलक भण्डारी, नेकपा माओवादी केन्द्रबाट जंगबहादुर बराल, नेकपा एमालेबाट जंगबहादुर शाहीको उम्मेदवारी दर्ता भएको छ । यस्तै राष्ट्रिय स्वतन्त्र पार्टीबाट प्रकाशकुमार बुढा र नेकपा (एकीकृत समाजवादी)का तर्फबाट जगत बहादुर हमालको उम्मेदवारी दर्ता भएको छ । राप्रपाले सुर्जे रावत र नेमकिपाले दुर्गबहादुर मगरलाई उम्मेदवार बनाएको छ ।
हुम्लाको सर्केगाड गाउँपालिकामा उपाध्यक्ष पदका लागि ७ जनाको उम्मेदवारी परेको छ । यहाँ कांग्रेसबाट सविता बुढा, एमालेबाट जाना शाही, माओवादी केन्द्रबाट देवकी तिमिल्सिनाको उम्मेदवारी दर्ता भएको हो । यस्तै राप्रपाबाट संगिता शाही, रास्वपाबाट बाँचा शाहीले उम्मेदवारी दर्ता गराएका छन् । यस्तै दुई जना स्वतन्त्र उम्मेदवारले उम्मेदवारी दर्ता गराएका छन् । स्वतन्त्र उम्मेदवारी दिनेमा नरेश शाही र रामसरा खड्का शाही छन् ।

जाजरकोटस्थित कुशे गाउँपालिका–७ को वडाध्यक्ष पदमा चार जनाको उम्मेदवारी दर्ता भएको छ । यस्तै दुल्लु नगरपालिका–१३ को वडा अध्यक्षमा ६ जनाको उम्मेदवारी दर्ता भएको छ । कालिकोटको तिलागुफा नगरपालिका–४ को वडा अध्यक्षमा ६ वटा दलले उम्मेदवारी दिएका छन् । रुकुम पश्चिम जिल्लाको सानोभेरी गाउँपालिका–५ को वडा अध्यक्ष पदमा प्रमुख तीन दलको उम्मेदवारी दर्ता भएको छ । यस्तै डोल्पाको त्रिपुरासुन्दरी नगरपालिका–५ को वडाध्यक्ष पदका लागि ४ जनाको उम्मेदवारी परेको जिल्ला निर्वाचन कार्यालय डोल्पाले जनाएको छ ।