खोज

बुटवल, ३ मङ्सिर ।

आन्तरिक राजस्व कार्यालय बुटवलमा सोमबार रक्तदान कार्यक्रम सम्पन्न भएको छ । राष्ट्रिय कर दिवस तथा कर सप्ताह, २०८१ को अवसरमा बुटवल–८, अस्पताल लाइनस्थित कार्यालय परिसरमा बिहान ९ बजेदेखि दिउँसो १२.३० बजेसम्म रक्तदान कार्यक्रम सञ्चालन गरिएको थियो ।

कार्यालयको आयोजना, नेपाल नियमित रक्तदाता संघ, बुटवलको समन्वय र रक्तसञ्चार केन्द्र, बुटवलको प्राविधिक सहयोगमा सम्पन्न कार्यक्रममा ४२ जनाले रक्तदान गरेकोे कार्यक्रमका संयोजक तथा कर अधिकृत सुवास पोख्रेलले जानकारी दिए । “कार्यालयका कर्मचारी, व्यवसायी, सेवाग्राही र पेशाकर्मी समेतको उल्लेखनीय उपस्थिति रहेको सो कार्यक्रममा जम्मा ४२ पिन्ट रगत सङ्कलन गरी रक्त सञ्चार केन्द्रलाई हस्तान्तरण गरेका छौँ,“ पोख्रेलले भने ।

आन्तरिक राजस्व विभाग वा मातहतका कार्यलयहरुले हरेक वर्ष मङ्सिर १ गते कर दिवस तथा मङ्सिरको पहिलो हप्ता विभिन्न कार्यक्रम गरी कर सप्ताह मनाउने गर्छन् । यो वर्ष “कर प्रणालीको सार, लगानीको आधार” भन्ने नारासहित कर दिवस मनाइँदै छ । कर अधिकृत पोख्रेलका अनुसार आन्तरिक राजस्व कार्यालय बुटवलले मङ्सिर १ गते प्रभातफेरी र मङ्सिर २ गते कार्यालयबाट सेवा प्राप्त गर्ने पहिलो सेवाग्राहीलाई सम्मान गरेको थियो । कर सप्ताहको अवसरमा यो हप्ताभरि विभिन्न ठाउँमा कर सचेतनामूलक कार्यक्रम आयोजना गर्ने कार्ययोजना रहेको आन्तरिक राजस्व कार्यालय बुटवलले जानकारी दिएको छ । त्यसैगरी सप्ताहको अन्तिम दिन विशेष कार्यक्रम गरी उत्कृष्ट कर्मचारीलाई पुरस्कृत र यस कार्यालयको कार्यक्षेत्र अन्तर्गत सबैभन्दा बढी आयकर दाखिला गर्ने करदातालाई सम्मान समेत गरिनेछ ।