खोज

प्यूठान, २ मंसिर ।

प्यूठानको गौमुखी गाउँपालिका–३ रजवाराका रमेश रानाले अग्लुङफेदीमा बाइक चलाएर पौठेजोरी खेल्नु पर्ने बाध्यता छ । वर्षा लागेपछि खोला बढेर बाइक तराउन सकिदैन्, जोखिम मोलेरै चिप्लो झोलुङ्गे पुलबाट हिड्नु पर्दछ । उनलाई पक्की पुलबाट हिड्न पाउने कामको थालनी हुँदा खुशीले गदगद छन् ।

मदाने गाउँपालिका–१ अग्लुङ गुल्मीका प्रदिप चन्दले वर्खा लागेपछि खोलामा यातायात वारपार नहुने समस्याले गौमूखी तथा मदानेबासीले सास्ती खेप्दै आएको बताउछन् । विरामी लगेर अस्पताल लैजाने बाटो समेत विकल्प नहुँदा गाउँबाट कष्टपूर्ण तरिकाले अस्पतालमा पु¥याउने नियती वर्सेनि हुने गर्दछ । अग्लुङफेदीमा निर्माण हुन थालेको पुलले यो समस्या हट्ने उनको विश्वास छ । ‘यहाँ पुल नहुदा धेरै दुःख भोगियो । बर्षामा मान्छे, गाडी सबै छेकिन्थे’ उनले भने– ’अब पुल बन्न थाल्यो । गाउँको समस्या समाधान होला भन्ने आशा छ, बरु पुल छिटो बनोस् ।’

शनिबार पक्की पुलको शिलान्यास भएसँगै प्यूठानको गौमुखी र गुल्मीको अग्लुङफेदी बासिन्दामा खुसी आएको हो । लुम्बिनी प्रदेशका भौतिक पूर्वाधार विकास मन्त्री भूमिश्वर ढकाल र कृषि भूमि व्यवस्था तथा सहकारी मन्त्री दिनेश पन्थीले संयुक्तरूपमा अग्लुङ्गफेदी खोलामा पक्की पुलको शिलान्यास गरेका छन् ।

सडक पूर्वाधार विकास कार्यालय गुल्मीसंग एम÷एस.कमल–अर्जुन–सिटी–जेभी रेसुंगा गुल्मीले २०८१ मंसिर ८ गते निर्माण सम्पन्न गर्नेगरीे काम थालेको छ । ४ करोड १४ लाख २९ हजार ९ सय ७९ रुपैयाँमा ठेक्का दिएको हो ।

शिलान्यास कार्यक्रममा बोल्दै मन्त्री ढकालले तोकिएकै समयमा कार्य सम्पन्न गर्न निर्देशन दिए । ’सन्तुलित विकासको अवधारणा अनुसार प्रदेश सरकारले पूर्वाधार निर्माणको कामलाई प्राथमिकता राखेको छ । सञ्चालन गरेका सबै योजनाको गुणस्तर कायम गर्ने प्रतिबद्धता प्रदेश सरकारले गरेको छ’, ढकालले भने । सरकारले देखिने र महशुस हुनेगरी विकास निर्माणको कामहरु अघि बढाएको ढकालले बताए ।

शिलान्यासको क्रममा बोल्दै कृषि, भूमि व्यवस्था तथा सहकारी मन्त्री पन्थीले विकट बस्तीलाई विकासको मुल धारमा ल्याउन सरकारले प्राथमिकतामा राखेको बताए ।

भौतिक पूर्वाधार विकास मन्त्रालयका सचिव भिमार्जुन पाण्डेले गुणस्तरीय पक्की पुल निर्माण हुने बताए । निर्माण व्यवसायी विजय खनालले भुक्तानि प्रक्रियामा कुनै समस्या नआए निर्धारित समय भन्दा अगाडि नै पुल निर्माण सम्पन्न गरेर हस्तान्तरण गर्ने प्रतिवद्धता व्यक्त गरे ।